فلم دھریندر میں لیاری آںے والے رنویر سنگھ کا تعلق بھی کراچی سے نکلا، مگر کیسے؟ حیران کن انکشاف

Is Dhurandhar Star Ranveer Singh Ancestor Belongs To Karachi

پاکستان مخالف موضوع پر بننے والی تازہ فلم دھریندر کے بعد بالی ووڈ اسٹار رنویر سنگھ ایک نئی اور غیر متوقع وجہ سے خبروں کی زینت بن گئے ہیں۔ حیران کن طور پر سامنے آنے والی معلومات کے مطابق رنویر سنگھ کی خاندانی جڑیں بھی کراچی سے جا ملتی ہیں، جس نے شائقین کو چونکا کر رکھ دیا ہے۔

بھارتی میڈیا رپورٹس کے مطابق فلم میں رنویر سنگھ ایک بھارتی خفیہ ایجنٹ کا کردار ادا کر رہے ہیں جو دہشت گردی کے خلاف مشن پر کراچی کے حساس علاقے لیاری تک پہنچتا ہے۔ کہانی کے مطابق وہ روزگار کی تلاش میں آئے ایک بلوچ نوجوان کا روپ دھار کر شہر میں داخل ہوتا ہے۔ اسی کردار اور فلم کے متنازع پس منظر کی وجہ سے رنویر سنگھ سوشل میڈیا اور بھارتی میڈیا میں خاصی بحث کا مرکز بنے ہوئے ہیں۔

دلچسپ پہلو یہ ہے کہ حقیقی زندگی میں رنویر سنگھ کا تعلق ایک سندھی خاندان سے بتایا جاتا ہے۔ ان کا مکمل نام رنویر سنگھ بھاونانی ہے، اور ان کے والدین کے آباؤ اجداد تقسیمِ ہند کے بعد 1947 میں کراچی سے ہجرت کر کے ممبئی جا بسے تھے۔ یوں فلم میں دکھائی جانے والی کراچی سے جڑی کہانی کسی نہ کسی حد تک ان کی اپنی خاندانی تاریخ کی جھلک بھی پیش کرتی محسوس ہوتی ہے۔

رنویر سنگھ کی سندھی ثقافت سے محبت محض ایک دعویٰ نہیں بلکہ ان کی ذاتی زندگی میں بھی صاف نظر آتی ہے۔ وہ ماضی میں سوشل میڈیا پر سندھی کڑی، چاول اور بوندی جیسے روایتی کھانوں سے اپنی پسندیدگی کا اظہار کر چکے ہیں۔ یہاں تک کہ انہوں نے اپنی شادی کے موقع پر اٹلی کے خوبصورت جھیل کومو میں سندھی روایات کے مطابق رسومات ادا کر کے اپنی ثقافتی پہچان کو فخر کے ساتھ اجاگر کیا تھا۔

یوں ایک طرف فلم میں پاکستان مخالف بیانیہ، اور دوسری جانب رنویر سنگھ کی اپنی جڑوں کا کراچی سے تعلق — یہ تضاد ہی اس کہانی کو مزید دلچسپ اور توجہ کھینچنے والا بنا دیتا ہے۔