میں مرنے والی ہوں اپنا خیال رکھنا.. بدنصیب جوڑے کی شادی کے دن آگ لگنے سے اپنے پیاروں کو کھونے والے اب کس حال میں ہیں ؟

"ہم دونوں بہت خوش تھے۔ میری منگیتر شادی میں گئی تھی اور وہاں سے نئے لباس پہنے خوبصورت تصاویر بھیج رہی تھی۔ تھوڑی دیر میں اس کا آخری فون آیا کہ میں مرنے والی ہوں، تم سے بہت محبت کرتی ہوں اپنا خیال رکھنا۔ میں نے پوچھا تمھیں کیا ہوا ہے تو اس نے جواب دیا کہ ہال میں آگ لگی ہے اور دھواں ہے۔ میں نے کہا ایک سیکنڈ میں آتا ہوں لیکن جب ہہنچا تو دیکھا میری منگیتر فون ہاتھ میں تھامے مردہ ہوچکی تھی"

یہ دل دہلا دینے والے الفاظ ہیں ڈی جے سٹیون نبیل کے جنھوں نے گزشتہ ہفتے عراقی شادی میں آتشزدگی کے واقعے میں اپنی محبت کرنے والی منگیتر کو ہمیشہ کے لیے کھو دیا۔

نبیل کے مطابق 'میں دروازے کے پاس گیا لیکن آگ اور دھواں بہت زیادہ تھا، دم گھٹ رہا تھا، ہم نے شیشے توڑے لیکن اندر داخل نہیں ہو سکے اور پھر بلڈوزر سے دیوار توڑی گئی، اندر گیا تو دیکھا میری منگیتر ہاتھ میں فون لیے مردہ پڑی تھی'۔

واضح رہے کہ عراق کے صوبے نینوا کے شہر ہمدانیہ میں شادی کی تقریب کے دوران ہال میں آگ بھڑک اٹھی جس سے 113 سے زائد افراد ہلاک اور 150 سے زائد افراد جھلس کر زخمی ہوگئے۔

اس افسوسناک واقعے میں دلہن کے 4 بھائی اور دلہا کی والدہ کا انتقال بھی ہوگیا۔ یوں شادی کا گھر ماتم کدہ بن گیا. نوبیاہتا جوڑا اپنی شادی کے دن خاندان سے محروم ہونے کے بعد کہتا ہے کہ ہم اب زندہ لاش بن چکے ہیں اور ہمارے پاس کہنے کے لئے کچھ نہیں.