میں نے خود خلیل الرحمٰن کی فلم چھوڑی تھی.. ایمان علی کون سے 2 مرد اداکاروں کے ساتھ کام نہیں کرنا چاہتیں؟

"مجھے کسی نے نہیں نکالا تھا بلکہ میں نے خود ہمایوں سعید کی فلم کی شوٹنگ سے صرف 3 دن پہلے فلم سے انکار کردیا تھا. وہ فلم خلیل الرحمٰن قمر کی لکھی ہوئی تھی"

یہ الفاظ اداکارہ ایمان علی نے حال ہی میں مزاحیہ پروگرام ’گپ شب‘ میں شرکت کے دوران کہے. ایمان علی اپنے بولڈ انداز کی وجہ سے کام نہ کرنے کے باوجود خبروں کا حصہ رہتی ہیں.

اگرچہ بات کرتے ہوئے ایمان نے فلم کا نام تو نہیں لیا لیکن میڈیا کے مطابق وہ بلاک بسٹر فلم "میں پنجاب نہیں جاؤں گی" کی بات کررہی ہیں جو بعد میں مہوش حیات نے کی اور فلم ہٹ ثابت ہوئی. اس بارے میں لکھاری خلیل الرحمٰن قمر کا کہنا تھا کہ ایمان علی کو فلم سے انھوں نے نکالا تھا جبکہ ایمان کہتی ہیں کہ کہانی سے اختلاف کی وجہ سے انھوں نے خود فلم چھوڑ دی تھی.

ایمان علی نے فرحان سعید کو سب سے بہترین معاون اداکار قرار دیا جبکہ کسی کا نام لیے بغیر ان کا کہنا تھا کہ وہ دو اداکاروں کے ساتھ کبھی دوبارہ کام نہیں کرنا چاہیں گی اور ان کے نام انگریزی حرف ایف سے شروع ہوتے ہیں. جب میزبان نے فہد مصطفیٰ اور فیروز خان کا نام لیا تو ایمان علی ہنس پڑیں.

اسی طرح ان کا کہنا تھا کہ وہ ہمایوں سعید اور ندیم بیگ کے ساتھ کام کریں گی لیکن بس ایک مخصوص رائٹر نے اسکرپٹ نہ لکھا ہو. اگرچہ لکھاری کا نام تو ایمان نے نہیں بتایا لیکن غالب گمان ہے کہ وہ خلیل الرحمٰن قمر کی ہی بات کررہی تھیں.