شدید دھوپ اور گرم لُو والی ہوائیں۔۔۔ جانیں موجودہ ہیٹ ویو میں خود کو کیسے محفوظ رکھا جائے؟

موسم گرما کی آمد ہوتے ہی کراچی سمیت ملک کے مختلف شہروں میں شدید گرمی کی اور گرم طوفانی ہواؤں کا سلسلہ جاری ہے، دن بھر شدید دھوپ اور گرم ہوا کے باعث تھپیڑ مارتی لُو کا راج ہے، جس کی وجہ سے شہری بھی بے حد پریشان ہیں۔

لیکن اس موسم میں سب سے زیادہ یہ جاننا ضروری ہے کہ ہیٹ ویو میں خود کو کیسے محفوظ رکھا جائے؟

ایسی صورتحال میں موسم کی سختی سے خود کو کیسے بچایا جائے اور اپنا خیال کیسے رکھا جائے آج کے فوڈز آپ کو بتائے گا تاکہ آپ رہ سکیں شدید گرمی میں بھی پرسکون اور توانا۔

تو چلیں پھر آپ کو چند ایسی ٹپس بتاتے ہیں جن پر عمل کر کے آپ خود کو اس خطرناک ہیٹ ویو سے بچا سکتے ہیں، لیکن پہلے یہ جان لیں کہ ہیٹ ویو کے صحت پر اثرات اور اس کی علامات کیا ہیں۔

ہیٹ ویو کے صحت پر اثرات اور علامات

ہیٹ ویو کے باعث انسان ہیٹ اسٹروک کا شکار ہو جاتا ہے، جس میں گرمی کی شدت کی وجہ سے حالت غیر ہو جاتی ہے اور جسم میں پانی کی شدید کمی کے ساتھ ساتھ لُو کے باعث جسمانی درجہ حرارت بڑھ جاتا ہے، ہیٹ ویو کی علامات میں سانس لینے میں دشواری، دل میں درد، بلڈ پریشر بڑھ جانا، الٹی محسوس ہونا، بے ہوش ہونا، سر درد اور جلد کا سُرخ ہونا شامل ہے۔

ہیٹ ویو سے محفوظ رہنے کی احتیاطی تدابیر

آپ گھر میں موجود ہوں یا باہر آنا جانا ہو پانی زیادہ سے زیادہ پینے کی کوشش کریں، بار بار منہ پر پانی ڈالیں۔

جسم میں نمکیات کی کمی کو دور کرنے کے لئے او آر ایس کا پانی، لیموں پانی، ٹھنڈے مشروبات کا استعمال کریں، موسم کی اس بگڑتی صورتحال میں طبی ماہرین کے مطابق ایک دن میں 6 سے 7 لیٹر پانی پیئیں جبکہ صبح 11 بجے سے سہ پہر 4 بجے تک دھوپ میں نکلنے سے گریز کریں، اگر باہر نکلیں تو دھوپ سے بچاؤ والے چشمے اور کیپ کا استعمال لازمی کریں۔

اگر گھر سے نکلنا بے حد ضروری ہو تو کوشش کریں کہ پانی اپنے ساتھ رکھیں اور بار بار پانی پیئیں، گھر سے نکلتے وقت اور واپس آ کر نہائیں ایک تولیہ گیلی کر کے اپنے ساتھ رکھیں جس سے بار بار منہ پوچھتے رہیں۔

اگر باہر سے آکر آپ کی طبعیت زیادہ خراب ہو رہی ہو اور آپ کے جسم کا درجہ حرارت 106C-108C کی صورت میں اپنی گردن، بغلوں، گھٹنوں اور پیٹھ پر برف کے ٹکڑے رکھیں۔

یاد رہے کہ ہیٹ اسٹروک کے باعث ہونے والا بخار دواؤں سے ٹھیک نہیں ہوتا اس لئے گھر پر کسی بھی قسم کی دواؤں کا تجربہ نہ کریں اور احتیاطی تدابیر اختیار کرنے کے بعد بھی اگر حالت بگڑے تو فوری اسپتال کا رُخ کریں۔

By sadia  |   In Health and Fitness  |   0 Comments   |   1933 Views   |   17 May 2021