لیموں خریدنے میں پیسے کیوں خرچ کریں جب گھر میں ہی اگا سکتے ہیں؟ رسیلے اور ڈھیروں لیموں سے لدے پودے اگانے کا آسان طریقہ

لیموں لینے بازار جاؤ تو کہیں 1200 روپے کلو لیموں مل رہے ہیں اور کہیں خبر چل رہی ہے کہ 300 روپے کا ایک بھی لیموں نہیں ملے گا۔ لیموں نہ ہوا سونا ہوگیا جو اب منہ مانگے داموں مل رہا ہے۔ البتہ اب فکر کی کوئی بات نہیں کیوں کہ ہم اپنے قارئین کو ایسا طریقہ بتانے جارہے ہیں جس سے انھی دکان داروں کے بلاوجہ کے نخرے نہیں اٹھانے پڑیں گے اور کھٹے میٹھے رس دار لیموں سارا سال اپنے گھر میں ہی مل جایا کریں گے۔

پاکستان میں لیموں کی کامیاب اقسام جو گھر میں آسانی سے لگ جاتی ہیں

سب سے پہلے آپ کسی پودوں کی دکان جائیں اور لیموں کا ایسا پودا خریدیں جس پر لیموں لگا ہوا ہو۔ کبھی بھی بیج سے لیموں کا پودا نہ اگائیں کیوں کہ جب تک اس کی گرافٹنگ نہ کی جائےاس پر پھل نہیں آتے اس لئے بجائے وقت ضائع کرنے کے دکان دار سے لیموں کا پودا خرید لیں۔ بڑا اور پھل لگا پودا ڈھائی سو جب کہ چھوٹا پودا 50 روپے سے 100 تک کا مل جائے گا۔

پودے کی حفاظت کیسے کریں؟

پاکستان میں لیموں کی بہتین اقسام میں چائنہ لیمو اور دیسی لیموں شامل ہیں۔ دیسی لیموں میں اگرچہ پھل آنے میں 4,5 سال لگ جاتے ہیں لیکن ان کا پھل بڑا اور رس دار ہوتا ہے جبکہ چائنہ لیموں میں سارا سال ہی پھل لگا رہتا ہے جو نسبتاً چھوٹا ہوتا ہے۔ لیموں کے پودے کو براہِ راست دھوپ میں رکھیں اور گرمی کے موسم میں روز پانی دیں لیکن زیادہ مقدار میں نہیں دیں۔ جب لیموں پر پھول نکل آئیں تو پانی دینا کم کر دیں۔

لیموں کے پتوں پر لاروا حملہ کر دیتے ہی اور پتوں اور پھل کو کھانے لگتے ہیں اس لئے اس کے پودے پر باقاعدگی سے اسپرے کرنا ضروری ہے۔ لیموں کے پودے کی جڑیں گملے کی اوپری سطح پر ہوتی ہیں اس لئے گوڈی کرنے کے لئے کسی تیز چیز کا استعمال نہ کریں۔ اگر لیموں کا پودا زمین میں لگایا جائے تو خوب بڑھتا ہے اور بہت زیادہ پھل دیتا ہے۔