جس کو ملا اس کا۔۔ قیمتی ہیروں سے بھرا انوکھا پارک، جہاں جا کر آپ کروڑ پتی بن سکتے ہیں! کہاں واقع ہے؟

Duniya Ka Aisa Park Jahan Se Diamond Niklte Hain

دنیا میں سیروتفریح کے لیے ہزاروں مقامات ہیں، لیکن کیا آپ نے کبھی ایسے پارک کا تصور کیا ہے جہاں آپ سیر کے دوران سچ مچ کے ہیرے تلاش کر سکیں؟ اور مزے کی بات یہ ہے کہ جو ہیرا آپ کو ملے، وہ آپ کا اپنا ہو جائے۔

جی ہاں، یہ کوئی کہانی نہیں بلکہ امریکا کی ریاست آرکنساس میں واقع ایک حقیقی اور منفرد پارک کی بات ہو رہی ہے۔ "کریٹر آف ڈائمنڈز اسٹیٹ پارک"

یہ پارک کسی عام تفریحی مقام سے بالکل مختلف ہے۔ یہاں آنے والے افراد صرف درختوں، پہاڑوں یا فطرت سے لطف اندوز ہونے نہیں آتے بلکہ زمین میں چھپے قیمتی خزانے کی تلاش میں آتے ہیں۔ اور اگر قدرت مہربان ہو، تو کچھ ہی دیر میں آپ کی کھدائی ایک چمکتے ہوئے ہیرے پر ختم ہو سکتی ہے۔

یہ پارک ایک غیر فعال آتش فشاں کے دہانے پر قائم ہے، جس کی مٹی میں قدرتی طور پر ہیرے موجود ہوتے ہیں۔ 1972 میں اسے عوام کے لیے کھولا گیا، اور تب سے لے کر آج تک ہزاروں خوش نصیب یہاں سے اپنی قسمت چمکا چکے ہیں۔

تازہ مثال لیں: حال ہی میں ایک سیاح نے یہاں سے ایک ایسا ہیرا تلاش کیا جس کی قیمت کئی ہزار ڈالر لگائی گئی۔ یہ کوئی انوکھا واقعہ نہیں، کیونکہ اب تک یہاں سے 35000 سے زیادہ ہیرے نکالے جا چکے ہیں۔

اگر آپ اس مہم میں شامل ہونا چاہتے ہیں تو آپ کو صرف ایک معمولی داخلہ فیس دینی ہوگی، بالغوں کے لیے $15 اور بچوں کے لیے $7۔ اور اگر ہیرا مل جائے؟ تو پھر مفت میں اس کا تجزیہ، وزن اور تصدیق کی جاتی ہے – اور پھر وہ مکمل طور پر آپ کا ہوتا ہے۔

آپ اپنے اوزار گھر سے لا سکتے ہیں یا پارک کے اندر سے کرائے پر حاصل کر سکتے ہیں۔ بس زمین پر نظر رکھیں، تھوڑی محنت کریں، اور ہو سکتا ہے اگلا قیمتی پتھر آپ کے ہاتھ لگ جائے۔