جسم اکڑا کر سانس روک لیتی تھی اور۔۔ سلمیٰ حسن نے اظفر علی سے خلع کیوں لی تھی؟ ماضی یاد کر کے جذباتی ہوگئیں

Salma Hasan Talks About Her Daughter And Divorce

پاکستانی ڈرامہ انڈسٹری کی باصلاحیت اداکارہ سلمیٰ حسن اپنی اداکاری اور خوبصورت پرفارمنس کی وجہ سے ہمیشہ ناظرین کی پسند رہی ہیں۔ ساتھ ہی وہ ایک بہادر اور خود مختار سنگل مدر بھی ہیں، جو اپنی بیٹی فاطمہ کی پرورش بہترین انداز میں کر رہی ہیں۔

سلمیٰ کی سابقہ شادی میزبان، اداکار اور پروڈیوسر اظفر علی سے ہوئی تھی، لیکن ان کی ایک اور اداکارہ نوین وقار سے شادی اور تعلقات کے باعث یہ رشتہ ختم ہو گیا۔

حالیہ دنوں میں سلمیٰ حسن نے صبح کا سما میں مدیحہ نقوی کے شو میں شرکت کی، جہاں انہوں نے پہلی بار اپنی ذاتی زندگی سے متعلق وہ پہلو کھول کر بیان کیا جس نے انہیں جذباتی طور پر توڑ کر رکھ دیا تھا۔

اپنے تجربے کا ذکر کرتے ہوئے سلمیٰ نے بتایا، میری بیٹی فاطمہ صرف آٹھ ماہ کی تھی جب اس کے رویے میں اچانک عجیب تبدیلیاں آنے لگیں۔ وہ فرش پر لیٹ جاتی، سختی سے جسم اکڑاتی، خود پر الٹیاں کر دیتی اور کئی دفعہ سانس روک لیتی تھی۔ اُس وقت میری اظفر کے ساتھ شدید کشیدگی چل رہی تھی اور مجھے سمجھ نہیں آ رہا تھا کہ اس کی اصل وجہ کیا ہے۔ میں اسے مختلف ماہرینِ نفسیات کے پاس لے کر گئی۔ آخرکار ایک ماہرِ نفسیات نے فاطمہ کو دیکھ کر کہا کہ، مسئلہ بچی میں نہیں، تم میں ہے… تمہارے جذبات وہ اپنے عمل سے ظاہر کر رہی ہے۔

سلمیٰ کہتی ہیں کہ ابتدا میں انہیں یہ بات بے معنی لگی، مگر وقت کے ساتھ احساس ہوا کہ یہی حقیقت تھی۔ جو درد، کھچاؤ اور ٹوٹ پھوٹ ان کے اندر تھی، وہ ننھی فاطمہ اپنے رویے میں دکھا رہی تھی۔

اسی لیئے کہا جاتا ہے کہ جب میاں بیوی کا رشتہ ختم ہوتا ہے تو اس کا اثر صرف ان پر نہیں بلکہ ان کی آنے والی نسلوں تک پر پڑتا ہے۔