گاڑی چلاتے ہوئے چھینک روکی اور پھر.. چھینک روکنے کا خوفناک انجام جس نے ڈاکٹروں کو بھی پریشان کردیا

اگرچہ چھینکنا فطری عمل ہے اور ظاہر ہے چھینک اچانک ہی آتی ہے اس کے باوجود کچھ لوگ اپنی چھینک کو روکنا عادت بنا لیتے ہیں. یہ سوچے بغیر کے اس کا ان کی صحت پر کیا اثر پڑے گا.

چھینک کا کام سانس کی نالی کو کھولنا ہوتا ہے جسے روکنے سے سنگین نتائج سامنے آسکتے ہیں. حال ہی میں ایسا کیس سامنے آیا ہے جس میں ایک شخص نے چھینک روکنے کمی کوشش کی تو اس کی سانس کی نالی میں سوراخ ہوگیا۔

اس شخص کا کہنا ہے کہ جب وہ گاڑی چلا رہا تھا تو اسے چھینک آنے لگی جسے اس نے روک لیا اس کے بعد ہی گلے میں شدید تکلیف کا احساس ہوا اور گلا بھی سوج گیا.

تھوڑی دیر میں ہی اس شخص کے لئے سانس لینا، تھوک نگلنا اور گلا ہلانا بھی مشکل ہوگیا. تکلیف سے نڈھال شخص جب ڈاکٹر کے پاس پہنچا تو سی ٹی اسکین سے پتا چلا کہ اس کی سانس کی نالی میں 2 ملی میٹر بڑا اور 5 ملی میٹر گہرا سوراخ ہوگیا ہے۔

ڈاکٹروں کا کہنا ہے کہ چھینک کو روکنے سے اس آدمی کی سانس کی نالی کے اوپری حصے میں معمول سے 20 گنا زیادہ دباؤ بڑھا جس سے چھوٹا سوراخ ہوگیا۔ البتہ زخم کو بھرنے میں 5 ہفتے لگ گئے.

ڈاکٹر کا کہنا ہے کہ اس طرح چھینک روکنا بالکل بھی درست نہیں ہے اور اس سے سنگین نتائج برآمد ہوسکتے ہیں.