چکن کو دھو کر پکانا چاہیئے یا بغیر دھوئے؟ جانیں چکن بنانے کے دوران کی جانے والی وہ عام غلطی، جو آپ کو بیمار کر سکتی ہے

جیسا کہ ہم سب جانتے ہیں کہ دنیا بھر میں سب سے زیادہ استعمال ہونے والا گوشت، مرغی کا گوشت ہے، اسی لیئے اس پر ماہرین نے کافی ریسرچ بھی کی ہے جس سے اسکے فائدے نقصان وغیرہ معلوم چلتے ہیں۔

ایسی ہی ایک رپورٹ آج ہم آپ کے ساتھ شئیر کر رہے ہیں، جس میں مگر دنیا بھر کے طبی اداروں یا فوڈ ریگولیٹرز کی جانب سے چکن کھانے والوں کو اہم مشورہ دیا گیا ہے۔

چکن کو دھو کر پکانا چاہیئے یا بغیر دھوئے؟

رپورٹ کے مطابق، چکن کے کچے گوشت کو پکانے سے پہلے دھونے سے گریز کرنا چاہیے۔ اس کی وجہ یہ ہے کہ گوشت کو دھونے سے خطرناک بیکٹریا کچن میں ہر جگہ پھیل سکتے ہیں۔ تو دھونے کے بجائے چکن کو براہ راست تیز آنچ پر پکانا زیادہ بہتر ہوتا ہے۔

ماہرین کے مطابق، گوشت کو دھونے سے پانی کے ذرات کے ذریعے بیکٹریا چکن میں ہر جگہ پھیل جاتے ہیں۔ اور نلکے کے پانی سے گوشت کو دھونے سے بیکٹریا کے پھیلنے کا خطرہ زیادہ ہوتا ہے۔ اس کے نتیجے میں مختلف امراض کا خطرہ بڑھتا ہے۔

مگر ہمارے یہاں بیشتر افراد چکن کے گوشت کو پکانے سے پہلے دھونا پسند کرتے ہیں۔ تو آئیے جانتے ہیں مرغی کے گوشت کو دھونے سے کن خطرات کا سامنا ہو سکتا ہے؟

چکن کے بیکٹریا کیا کرتے ہیں؟

چکن کے گوشت پر کیمپائلوبیکٹر اور سالمونیلا جیسے خطرناک بیکٹریا موجود ہوتے ہیں۔ کیمپائلوبیکٹر بیکٹریا سے ہیضہ کا خطرہ بڑھتا ہے جبکہ سالمونیلا سے آنتوں کے امراض، ہیضہ، بخار اور پیٹ درد جیسے مسائل کا سامنا ہو سکتا ہے۔

کچھ لوگوں کا خیال ہوتا ہے کہ سرکے یا لیموں کے رس سے چکن کی صفائی بیکٹریا کو ختم کر دیتی ہے۔ جبکہ تحقیقی رپورٹس میں دریافت کیا گیا کہ، پانی یا سرکے سے چکن کے گوشت کو دھونے سے بیکٹریا ختم نہیں ہوتے بلکہ دیگر اشیا تک ان کے پھیلنے کا خطرہ بڑھتا ہے۔

اسکا متبادل کیا ہے؟

کچھ افراد گوشت دھونے کی عادت سے مجبور ہوتے ہیں، ایسے لوگوں کیلیئے ماہرین کا مشورہ ہے کہ نلکے کے پانی کی بجائے پانی سے بھری بالٹی یا سنک میں گوشت کو دھونے کی کوشش کریں۔ اس کے بعد کاغذ سے اردگرد کی سطح کی صفائی کریں، جس سے آلودگی یا بیکٹریا کے پھیلنے کا خطرہ کم ہو جائے گا۔