عید سے قبل عید کی تیاری کرلیں گھر کے ساتھ ساتھ اپنے چہرے کو بھی صاف ستھرا اور تروتازہ کرنا ضروری ہے

عید کا تہوار ہم سب مسلمانوں کے لئے بہت اہم اور خوشی کا موقع ہے۔اس موقع پرخواتین کا کام اور لوگوں کی نسبت زیادہ بڑھ جاتا ہے اوران کو گھر کی صفائی ستھرائی کے ساتھ مہمانداری، گھر کے کھانے پکانے اور پھر اپنی اور شوہر اور بچوں کی تیاری بھی دیکھنی ہوتی ہے۔ ایسے میں خصوصاً چاند رات تو ایسی بھاگ دوڑ مچتی ہے کہ سب پریشان ہوجاتے ہیں اوراگرغیرمتوقع عید ہوجائے تو وہ تو پھر مصروفیات کا کیا ہی کہنا۔ ایسے میں خواتین کے لئے ضروری ہے کہ گھر کے ساتھ ساتھ اپنا بھی خیال رکھیں اور اپنے لئے بھی ضرور وقت نکالیں۔ اکثر یہ بھی دیکھا گیا ہے کہ چاند رات کو خواتین کی پوری رات بیوٹی پارلر میں ہی نکل جاتی ہے کیونکہ اس وقت رش اتنا زیادہ ہوتا ہے کہ چھوٹا سا بھی کام ہو تو اس میں گھنٹوں لگ جاتے ہیں اور کام بھی تسلی بخش نہیں ہوتا۔ اس لئے بہتر یہ ہے کہ پارلر کے بجائے گھر میں ہی آپ اپنے چہرے کو تروتازہ اور فریش کرنے کے لئے کچھ جتن کر لیں، تاکہ کام بھی اچھا ہو جائے اور آپ خود بھی مطمئن ہو جائیں۔ اسی لئے ہم نے آپ کے لئے بھی یہاں کچھ بہت آسان ٹپس ڈھونڈی ہیں جو کہ آپ کے حسن کی حفاطت میں آپ کے کام بھی آئیں گی اور اس کے علاوہ اس میں آپ کا زیادہ وقت بھی برباد نہیں ہوگا۔ تو دیکھیے اس کے لئے ہمیں کیا کیا چیزیں درکار ہوں گی۔
جو کا دلیہ(انسٹنٹ اوٹ میل) 1 چمچ
دہی 1 چمچ
شہد 1 چمچ
جو کا دلیہ یا انسٹنٹ اوٹ میل جو بھی گھر میں موجود ہو وہ لے لیں اس کو گرائنڈر میں ڈال کر پاؤڈر بنا لیں اس پاؤڈر میں سے ایک چمچ ایک پیالے میں نکال لیں اب اس میں دہی ، اور شہد ملا کر اس کا فائن پیسٹ بنالیں، اب اس پیسٹ کو اپنے چہرے پر لگانے سے پہلے اپنے چہرے کو اچھی طرح دھو کر خشک کر لیں۔ اس کے بعد یہ پیسٹ چہرے پر لگا کر اس کا ایک منٹ تک مساج کریں۔ اس کے بعد اس کو 15 منٹ تک لگا رہنے دیں۔ جب خشک ہو جائے تو سا دہ پانی سے چہرہ دھو لیں۔ آپ کی جلد ایک دم نکھر جائے گی۔ یہ ماسک چہرے کا ایکسٹرا آئل کنٹرول کرتا ہے، اس سے جلد ہائیڈریٹ ہوتی ہے، رنگ صاف ہوتا ہے۔ چہرے کے داغ دھبوں اور ایکنی کے لئے بھی یہ ماسک بہترین ہے۔ چہرے کی جھریاں بھی دور کرتا ہے ، دہی اور شہد اینٹی ایجنگ ایجنٹ ہیں اس کی وجہ سے جلد ہائیڈریٹ بھی رہتی ہے اور جھریاں بھی نہیں پڑتیں۔