بیٹا بہت یاد آتا ہے.. بلال پاشا کی آخری بار والد سے فون پر کیا بات ہوئی؟ بوڑھا باپ بتاتے ہوئے روپڑا

"میرے بیٹے نے مجھ سےکبھی نہیں کہا کہ وہ پریشان ہے یا اسےکوئی ٹینشن ہے۔ ہم غریب لوگ ہیں. میرا بیٹا کوئی نوابوں کا بیٹا نہیں تھا. اس کی صلاحیت، اخلاق اور پیار مجھے بہت یاد آتا ہے. وہ مجھے ایسے سمجھاتا تھا جیسے کوئی باپ بیٹےکو تسلی دیتا ہے۔ آخری بار بات ہوئی تو اس نے کہا تھا کہ بابا میری پوسٹنگ راولپنڈی میں ہوگئی ہے میں وہاں سے چھٹی لے کر آپ کے پاس آؤں گا یا پھر آپ کو وہاں بلوا لوں گا. آج اسے پنڈی جانا تھا مگر وہ رب کے پاس چلا گیا"

یہ کہنا ہے گزشتہ روز خودکشی کرنے والے چیف ایگزیکٹو آفیسر (سی ای او) کنٹونمنٹ بورڈ بنوں بلال پاشا کے والد کا جو لاڈلے بیٹے کی تدفین کے بعد میڈیا سے بات کرتے ہوئے رو پڑے.

واضح رہے کہ ڈسٹرکٹ پولیس آفیسر (ڈی پی او) بنوں اسماعیل خان کے مطابق بلال پاشا نے سر پر گولی مار کر خودکشی کی جس کے بعد سوشل میڈیا پر ان کی جوان موت نے ہنگامہ برپا کردیا ہے.

پولیس کا کہنا ہے کہ بلال پاشا کی خون میں لت پت لاش ان کے گھر سے ملی جہاں انہوں نے خود کو گولی مار کر ہلاک کرلیا تھا. بلال نے چند سال پہلے شادی بھی کی تھی جو ختم ہوگئی تھی.