جب والد نے صبا حمید سے شادی کی تو۔۔ علی عباس نے سالوں سے دل میں چھپے زخم کھول کے رکھ دیئے

Ali Abbas Shares Life After Waseem Abbas And Saba Hameed Marriage

اداکارعلی عباس نے حال ہی میں احمد علی بٹ کے پوڈکاسٹ "ایکسکیوز می" میں وہ بات کہہ دی جو اکثر دلوں میں دفن رہتی ہے۔

علی نے بتایا، جب ابو نے دوسری شادی کی، میں صرف 11 یا 12 برس کا تھا۔ وہ لمحہ میری زندگی کا پہلا بڑا صدمہ تھا۔

وسیم عباس نے اداکارہ صبا حمید سے شادی کی، اور ایک ننھے بیٹے کے کندھوں پر ذمہ داری، بوجھ، اور خاموشی آ گئی۔ ماں شدید ذہنی پریشانی میں تھیں، اور باپ ایک نئی زندگی میں مصروف۔ تب علی نے خود کو والد کے کردار میں ڈھال لیا — چھوٹے بہن بھائیوں کے لیے سائبان بن گئے۔

وہ کہتے ہیں، میں نے کبھی مسئلہ بننے کے بجائے، مسئلے کا حل بننے کا سوچا۔

لیکن اس خودساختہ مضبوطی کے پیچھے ایک بچہ مسلسل ٹوٹتا رہا، اور باپ سے دوری بڑھتی گئی۔ وقت گزرا، زخم پر پردہ پڑا، اور ایک دن علی نے خود پہل کر کے والد سے بات شروع کی۔ تب احساس ہوا کہ دوریاں صرف بچوں کو نہیں، والدین کو بھی توڑ دیتی ہیں۔

یونہی لفظوں کی دیوار گرنے لگی، اور پھر باپ بیٹے کا رشتہ دوبارہ جُڑ گیا اس بار زیادہ سچا، زیادہ خاموش، اور زیادہ گہرا۔

علی عباس کی یہ کہانی صرف ایک ذاتی لمحہ نہیں، بلکہ ان تمام نوجوانوں کے لیے آئینہ ہے جو خاندانی بکھراؤ سے گزر رہے ہیں۔

رشتے ختم کرنے میں پل لگتا ہے، لیکن جوڑنے میں حوصلہ، وقت اور دل درکار ہوتا ہے۔