شہریار چوہدری سے شادی کا نہیں سوچا۔۔ وینا ملک کو ہونے والے شوہر میں کون سی خوبیاں چاہئیں؟

وینا ملک نے حال ہی میں 'سنو ٹی وی' کے پروگرام میں شرکت کے دوران کہا، "میرے اور شہریار چوہدری کے درمیان اچھے تعلقات ہیں، لیکن ابھی تک ہم نے شادی کا حتمی فیصلہ نہیں کیا۔"

پروگرام میں وینا ملک نے اپنی ذاتی زندگی اور شادی کے بارے میں کھل کر بات کی۔ انہوں نے بتایا کہ "مجھے تاحال شادی کے لیے کئی پیشکشیں آتی ہیں، اور میرے والدین کے پاس بھی رشتہ آتے ہیں، لیکن میں انہیں نظر انداز کرتی ہوں۔ اگر مجھے شادی کرنی ہی نہیں، تو ان پیشکشوں کا کیا فائدہ؟"

وینا کا کہنا تھا، "میں ایک سیدھی سادی حسن پرست عورت ہوں۔ مجھے ایسا شخص چاہیے جو دراز قد، خوبصورت، اور مکمل ہو۔ سانولی رنگت مجھے پسند نہیں، اور میرے لیے ضروری ہے کہ میرا ہونے والا شوہر مجھ سے قد میں لمبا ہو، کیونکہ میں خود پانچ فٹ پانچ انچ کی ہوں۔"

ایک سوال کے جواب میں انہوں نے مزید کہا، "جو شخص بدصورت ہے، وہ بدصورت ہی رہتا ہے، اور میں حسن کی قائل ہوں۔ میں اپنے جیون ساتھی میں خوبصورتی اور اچھائی دونوں کی تلاش میں ہوں۔"

جب شہریار چوہدری سے تعلقات کی بات آئی تو وینا ملک نے کہا، "شہریار چوہدری سے میرے اچھے تعلقات ہیں، اور ہم اچھے دوست ہیں۔ ہم پہلے سے ایک دوسرے کو جانتے تھے، اور ہمارا رابطہ انسٹاگرام کے ذریعے ہوا۔ وہ ماسٹر کی ڈگری رکھتا ہے اور بہت خوبصورت شخص ہے، لیکن ابھی تک ہم نے شادی کے بارے میں کوئی حتمی فیصلہ نہیں کیا۔"

وینا نے یہ بھی بتایا کہ شادی کے معاملے میں وہ ہمیشہ کنفیوژڈ رہتی ہیں، اور اگر آج وہ شہریار سے شادی کی بات کریں اور بعد میں اپنا فیصلہ بدلیں تو میڈیا ان کے پیچھے پڑ جائے گا۔ "اگر ہم نے شادی کی تو سب کو معلوم ہو جائے گا، لیکن فی الحال میں شادی کے بارے میں کوئی حتمی فیصلہ نہیں کر پائی ہوں۔"

ماضی میں وینا ملک نے شہریار چوہدری کے بارے میں مبہم انداز میں بات کی تھی، لیکن اس پروگرام میں پہلی بار انہوں نے ان کے ساتھ اپنے تعلقات پر کھل کر بات کی۔ وینا نے یہ بھی بتایا کہ شہریار حافظ قرآن ہیں اور سوشل میڈیا پر وہ خود کو شہریار کی "بندی" بھی قرار دے چکی ہیں۔