پیشاب کی نالی کا انفیکشن اور گردے میں پتھری.. عورتوں اور مردوں کی ان بیماریوں سے نجات کے لیے کروندے کو کیسے استعمال کریں؟

یو ٹی آئی ایک عام انفیکشن ہے جو اس وقت ہوتا ہے جب بیکٹیریا، اکثر جلد یا ریکٹم سے، پیشاب کی نالی میں داخل ہوتے ہیں، اور پیشاب کی نالی کو متاثر کرتے ہیں۔ یہ انفیکشن پیشاب کی نالی کے کئی حصوں کو متاثر کر سکتا ہے، لیکن سب سے عام قسم مثانے کا انفیکشن (سسٹائٹس) ہے۔

یورینری ٹریکٹ انفیکشن (یو ٹی آئی) سے بالخصوص خواتین زیادہ متاثر ہوتی ہیں اور یہ مرض ان پر بار بار حملہ آور ہوسکتا ہے۔

پیشاب کی نالی کے انفیکشن (یو ٹی آئی) کی علامات میں شامل ہے۔۔ پیشاب کرتے وقت درد یا جلن کا احساس، رات کے دوران معمول سے زیادہ کثرت سے پیشاب آنا، پیشاب کا رنگ گہرا ہونا یا تیز بو آنا۔

پیشاب کی نالی کا انفیکشن ہونے کی صورت میں کروندے (کرینبیری) کا رس پینا کافی مفید ثاہت ہوسکتا ہے۔

آسٹریلین یونیورسٹی کے سائنسدانوں نے ایک مطالعے سے بتایا ہے کہ، "اگر خواتین باقاعدگی سے کرینبیری کا جوس پئیں تو ان کی 25 فیصد اور رس پینے والے بچوں کی 50 فیصد تعداد میں بار بار یو ٹی آئی کا خطرہ ٹل سکتا ہے۔"

اسی طرح یو ٹی آئی میں بلیڈر ریڈیو تھراپی جیسے پیچیدہ عمل سے گزرنے والے مریض اگر اس رس کو جاری رکھیں تو ان میں دوبارہ انفیکشن ہونے کا خطرہ 53 فیصد تک کم ہوسکتا ہے۔

آسٹریلیئن سائنسدانوں نے 9000 افراد پر مشتمل 50 تحقیقات کا مفصل جائزہ لیا ہے۔ اس طرح یہ اپنی نوعیت کی پہلی بڑی تحقیق ہے جس میں کرینبیری کی رس کی افادیت سائنسی طور پر سامنے آئی ہے۔

یو ٹی آئی، بیکٹیریا سے پھیلنے والا ایک تکلیف دہ انفیکشن ہے جس سے پیشاب کی نالی، مثانے اور گردے متاثر ہوتے ہیں۔ دنیا بھر میں ہر دو میں سے ایک عمر رسیدہ خاتون اس کی شکار ہوسکتی ہے۔

عورتوں کے علاوہ مردوں کے مثانے کی کمزوری اور گردوں میں پتھری کو توڑ کر گھلانے کے لئے بھی کروندے کا جوس بے انتہا مفید مانا جاتا ہے.

دنیا بھر میں کروندے کا رس پیشاب کے امراض میں دینے کا عام رواج ہے۔ طبِ یونانی میں بھی اس کا ذکر ملتا ہے لیکن سائنسی طور پر اب اس پر تحقیق شروع ہوئی ہے۔ تاہم کئی کمپنیاں پہلے ہی کرینبیری جوس پاؤڈر کی صورت میں فروخت کر رہی ہیں جو پاکستان میں بھی باآسانی مل جاتا ہے۔

جوس کے علاوہ کروندے کو سلاد میں یا پھر خشک کر کے مختلف کھانوں میں ڈال کر بھی استعمال کیا جاسکتا ہے. کروندے کا جیم بھی بنا سکتے ہیں.