عروسہ صدیقی کے گھر ننھے مہمان کی آمد! 40 سال کی عمر میں دوبارہ ماں بننے پر کیا مشکلات آئیں؟

Uroosa Siddiqui Reveals Second Child Birth And Difficulties

پاکستانی ڈرامہ انڈسٹری کی ہر دلعزیز اور مزاحیہ اداکارہ عروسہ صدیقی ہمیشہ ہی ناظرین کی توجہ کا مرکز رہی ہیں۔ ان کی خوش مزاجی، سادہ مزاح اور اپنی زندگی کے تجربات کو دوسروں کے ساتھ بانٹنے کا انداز سبھی کو بےحد پسند آتا ہے۔ عروسہ نہ صرف ڈراموں میں جلوہ گر ہوتی ہیں بلکہ گھریلو ویلاگز کے ذریعے بھی مداحوں کو اپنی زندگی کے حسین اور حقیقی لمحوں سے روشناس کرواتی ہیں۔

مگر کچھ عرصے سے وہ اسکرین سے اوجھل تھیں اور مداح یہ سوچ رہے تھے کہ آخر وہ کہاں غائب ہوگئیں۔ اب اداکارہ نے خود سب سے خوبصورت خبر شیئر کر کے سب کے دل جیت لیے ہیں۔

عروسہ صدیقی نے بتایا کہ وہ دوسری بار ماں بنی ہیں۔ ان کے ہاں ایک ننھے شہزادے فرجاد کی آمد ہوئی ہے جو ایک ماہ قبل دنیا میں آیا۔ اداکارہ نے اپنے وی لاگ میں نہ صرف یہ خوشخبری سنائی بلکہ اپنے حمل کے سفر کی کہانی بھی سنائی جس نے ان کے چاہنے والوں کو بےحد خوش کر دیا۔

اداکارہ نے انکشاف کیا کہ یہ ان کا دوسرا بچہ ہے اور پہلے بیٹے کے بعد اللہ نے سات سال کے وقفے سے یہ خوشی عطا کی ہے۔ انہوں نے یہ بھی کہا کہ انہوں نے 40 سال کی عمر میں ماں بننے کا تجربہ حاصل کیا، اور اگرچہ ان کا حمل زیادہ تر پرسکون رہا، مگر سی سیکشن کے بعد صحتیابی اس بار کچھ مشکل رہی۔

عروسہ نے خاص طور پر اپنے سسر اور ساس کی تعریف کی جو لاہور سے آ کر ان کے ساتھ رہے اور ہر لمحے سہارا بنتے رہے۔ وہ کہتی ہیں کہ عمر بڑھنے کے ساتھ جسم کی طاقت بدل جاتی ہے، اسی لیے اس بار بحالی کا مرحلہ ذرا سخت تھا۔

اب وہ آہستہ آہستہ نارمل زندگی کی طرف لوٹ رہی ہیں اور جلد ہی وزن کم کرنے کے سفر کا آغاز کریں گی۔ انہوں نے یہ وعدہ بھی کیا کہ اپنی پوسٹ پریگنینسی جرنی کو بھی مداحوں کے ساتھ شیئر کریں گی تاکہ دوسروں کے لیے بھی حوصلہ افزائی بن سکے۔

ننھے فرجاد کی آمد نے عروسہ صدیقی کی زندگی میں خوشیوں کا نیا رنگ بھر دیا ہے اور مداح ان کے نئے سفر کا بےچینی سے انتظار کر رہے ہیں۔