شادی کے بعد چکر یا ساس کا ظلم، دماغ خراب کر رکھا ہے! سماجی کارکن شیما کرمانی کا پاکستانی ڈراموں پر دوٹوک بیان

Sheema Kermani Calls Out Extra Marital Affairs In Pakistani Dramas

معروف رقاصہ، سماجی کارکن اور استانی شیما کرمانی، جو پاکستان میں خواتین کے حقوق کی جراتمند آواز سمجھی جاتی ہیں، ہمیشہ اپنے دوٹوک مؤقف اور بے باک انداز کی وجہ سے پہچانی جاتی ہیں۔ حال ہی میں انہوں نے ایف ایچ ایم کو دیے گئے ایک انٹرویو میں معاشرتی رویوں اور میڈیا کے منفی اثرات پر کھل کر بات کی۔

شیما کرمانی کا کہنا تھا کہ آج کے مرد پہلے سے زیادہ غیر حساس اور سخت گیر ہو چکے ہیں۔ اُن کے مطابق یہ سب کچھ اُن نظریات اور مواد کا نتیجہ ہے جو انہوں نے بچپن اور جوانی میں دیکھا، پڑھا اور سنا۔ آمرانہ دور اور پدرسری سوچ کو جس طرح میڈیا کے ذریعے عام کیا گیا، اُس نے مردوں کی سوچ کو بگاڑ دیا ہے۔

یہی نہیں، انہوں نے پاکستانی ڈرامہ انڈسٹری پر بھی خوب تنقید کے تیر برسائے۔ اُن کا کہنا تھا ہر ڈرامے میں ایک ہی کہانی — شوہر کا دوسری شادی کی خواہش، یا بیوی کا افیئر۔ کیا واقعی ایسا ہو رہا ہے؟ ہرگز نہیں!

شیما نے مزید کہا، ایسا دکھایا جا رہا ہے جیسے ہر گھر میں ساس ایک ولن ہو، حالانکہ حقیقت میں ہر ساس بری نہیں ہوتی۔ اُن کے مطابق یہ جھوٹی اور سنسنی خیز کہانیاں معاشرے کی سوچ کو مزید مسخ کر رہی ہیں۔

شیما کرمانی کا یہ بے لاگ انٹرویو سوشل میڈیا پر خوب وائرل ہو رہا ہے، جہاں لوگ اُن کے خیالات سے متفق بھی ہیں اور اختلاف بھی کر رہے ہیں — لیکن ایک بات طے ہے، اُن کی بات ہمیشہ کچھ سوچنے پر ضرور مجبور کر دیتی ہے۔