رشتہ بھیجنے سے پہلے شرط رکھی کہ۔۔ قدسیہ علی نے مردوں کی منافقت سے پردہ اٹھاتے ہوئے تلخ حقیقت بتا دی

Qudsia Ali Talks About Mentality Of Pakistani Men Towards Actresses

اداکارہ قدسیہ علی نے حال ہی میں اپنے دل کی بات کھولتے ہوئے کہا کہ ہمارے معاشرے میں مرد اداکاراؤں کی خوب تعریف کرتے ہیں، ان کی صلاحیتوں کے معترف بھی ہوتے ہیں، مگر بات جب انہیں زندگی کا ساتھی بنانے کی آتی ہے تو وہ پیچھے ہٹ جاتے ہیں۔

قدسیہ علی نے مختصر عرصے میں اپنی بہترین اداکاری سے ایسی پہچان بنائی کہ لوگ انہیں ’اولاد‘ میں ڈیبیو کے فوراً بعد ہی یاد رکھنے لگے۔ ایک کردار نے انہیں شہرت کی منزل پر پہنچایا اور پھر ان کے کیریئر نے رُک کر پیچھے نہیں دیکھا۔

نجی ٹی وی کے ایک مزاحیہ پروگرام میں گفتگو کے دوران اداکارہ نے اپنی ذاتی زندگی کے تجربات بھی شیئر کیے۔ ان کا کہنا تھا کہ ہمارے معاشرے میں آج بھی آزاد خیالات رکھنے والی عورتوں کو ترازو میں تولا جاتا ہے— اور اداکارائیں تو خاص طور پر لوگوں کی نظروں کا مرکز بن جاتی ہیں۔

انہوں نے بتایا کہ کچھ عرصہ پہلے انہیں ایک ایسے شخص نے جج کیا جس سے وہ دوستی کی حد تک قریب آگئی تھیں۔ تعلق آگے بڑھا تو سامنے سے شرط رکھ دی گئی کہ اگر رشتہ چاہیے تو انہیں اپنا پیشہ چھوڑنا ہوگا۔

قدسیہ نے افسوس کا اظہار کرتے ہوئے کہا کہ لوگ خواتین فنکاروں کو سراہتے ضرور ہیں، ان کے کام کی تعریف بھی کرتے ہیں، لیکن جب بات اپنے گھر کی دہلیز تک لانے کی ہوتی ہے تو وہی لوگ قدم پیچھے کر لیتے ہیں—گویا ستاروں کو چاہ تو لیا جاتا ہے، مگر قبول نہیں کیا جاتا۔