یوں تو ہر پھل ہی قدرت کی طرف سے انسانوں کے لئے ایک تحفہ ہے مگر پپیتا فوائد اور ذائقے کے اعتبار سے ایک بہترین پھل ہے اور اگر آپ اس کا روزانہ استعمال نہ بھی کریں مگر اس کا ہفتے میں ایک مرتبہ استعمال آپ کی صحت پر حیرت انگیز فوائد کی وجہ بن سکتا ہے وہ کیسے آیئے آپ کو بتاتے ہیں۔
ہفتے میں ایک مرتبہ پپیتے کا استعمال کیوں کرنا چاہیئے؟
• کولیسٹرول گھٹائے
پپیتے میں وافر مقدار میں فائبر پایا جاتا ہے جو کہ کولیسٹرول کو کم کرنے میں بےحد مدد کرتا ہے، جب کہ اس میں اینٹی آکسیڈینٹ اور دیگر وٹامنز بھی پائے جاتے ہیں جو امراضِ قلب جیسی جان لیوا بیماری میں مبتلا ہونے کے خدشات بھی دور کر دیتے ہیں۔
• پیٹ کے کیڑوں کا خاتمہ
پپیتے کے استعمال سے پیٹ کے کیڑوں کا خاتمہ ہو جاتا ہے پیٹ میں موجود یہ کیڑے صحت کے لئے خطرناک ہوتے ہیں اور یہ ہماری خوراک کو بھی استعمال کر لیتے ہیں جس سے ہمیں جسم کی ضرورت کے مطابق غذائیت حاصل نہیں ہو پاتی اس لئے پپیتے کو بیج سمیت استعمال کرنے سے پیٹ کے کیڑوں کا خاتمہ ہو جاتا ہے۔
• قوتِ مدافعت میں اضافہ
پپیتے کا استعمال قوتِ مدافعت میں اضافے کے لئے بھی بہترین ہے اس میں بےشمار غذائی اجزاء موجود ہوتے ہیں پپیتے میں موجود وٹامن اے، سی اور ای ہماری قوتِ مدافعت کو بڑھانے میں اہم کردار ادا کرتا ہے۔
• بڑھاپے کو روکے
وقت کے ساتھ ساتھ انسان کا جسم اور اس کی جلد ڈھلنے لگتی ہے لیکن پپیتا ایک ایسا پھل ہے جس کے استعمال سے قبلِ از وقت بڑھاپا آنے سے روکا جا سکتا ہے، اس میں موجود وٹامن سی، ای اور اینٹی آکسیڈینٹس جلد کو جھریوں اور سورج سے متاثر ہونے سے بھی بچاتے ہیں۔
• بلڈ پریشر گھٹائے
پپیتے میں موجود ‘کارپین‘ ہائی بلڈپریشر کو معتدل کرنے میں اہم کردار ادا کرتا ہے، اس لئے بلڈ پریشر کے شکار افراد کو کم از کم ہفتے میں ایک مرتبہ پپیتے کا استعمال لازمی کرنا چاہیئے۔