جو ظلم ماں نے کیا وہی اپنی بیٹی پر کیا۔۔ جیا خان سے کون سا خونی رشتہ ہے؟ سنگیتا نے درد بھرے راز کھول دیئے

Pakistani Actress Sangeeta Reveals Painful Tragedies Of Her Life

"میری شادی میری سب سے بڑی غلطی تھی۔"

یہ الفاظ پاکستان کی مشہور اداکارہ و ہدایتکارہ سنگیتا نے وصی شاہ کے پروگرام زبردست میں کہے، جب انہوں نے اپنے دل کے وہ زخم کھولے جنہیں برسوں چھپایا۔

کہانی کچھ یوں ہے کہ ایک دن وہ سیٹ پر ڈائریکشن دے رہی تھیں کہ اچانک اُن کی والدہ آئیں اور سب کے سامنے سخت جملے کہہ ڈالے۔ یہ لمحہ اتنا کٹھن تھا کہ سنگیتا نے دریائے سوات میں چھلانگ لگا کر زندگی ختم کرنے کا سوچ لیا۔

اسی وقت فلم کے ہیرو ہمایوں قریشی نے انہیں بچایا، اور اگلے ہی دن غصے میں سنگیتا نے انہی کو شادی کی پیشکش کر دی۔ والدین راضی نہ تھے، ماں نے یہ رشتہ کبھی قبول نہ کیا، اور یوں یہ فیصلہ اُن کی زندگی کا سب سے کربناک موڑ بن گیا۔

تین سال بعد یہ رشتہ ٹوٹ گیا، لیکن اس سے پیدا ہونے والی تین بیٹیاں سنگیتا کی دنیا بن گئیں۔ وہ تنہا ان کی پرورش کرتی رہیں۔

مگر دکھ یہیں ختم نہ ہوا — بڑی بیٹی محض 16 برس کی تھی کہ سنگیتا نے سماج کے خوف سے جلدی شادی کر دی۔ سوچا کہ لوگ کسی اداکارہ کی بیٹی پر انگلی نہ اٹھائیں، لیکن یہ فیصلہ بھی غلط نکلا۔ آج بھی وہ اس فیصلے کو اپنی زندگی کی سب سے بڑی ندامت قرار دیتی ہیں۔

سن 2000 میں سنگیتا کی زندگی نے ایک اور موڑ لیا۔ وہ ہیپاٹائٹس سی میں مبتلا ہوئیں۔ ڈاکٹرز نے ہاتھ کھڑے کر دیے کہ شاید وہ زیادہ عرصہ نہ جی سکیں۔ پاکستان سے بھارت تک علاج ہوا، 90 انجیکشن لگے، سرجری ہوئی — مگر سنگیتا نے ہمت نہ ہاری اور آخرکار صحت یاب ہو گئیں۔ آج وہ دوسروں کو یہی سبق دیتی ہیں؛

"بیماری سے لڑو، امید کبھی مت چھوڑو۔"

سنگیتا کا سب سے بڑا زخم اُن کا اکلوتا بھائی تھا، جو کینسر کے باعث دنیا سے رخصت ہو گیا۔ وہی بھائی جن کی بیٹی بھارت کی معروف اداکارہ جیا خان تھیں۔ جیا کی کم عمری میں ہی پرسرار طور پر موت ہوگئی، جسے کبھی خودکشی تو کبھی قتل کہا گیا۔ اور سنگیتا کے مطابق اُن کا بھائی بیٹی کے دکھ میں زندگی بھر آنسو بہاتا رہا۔

یہ کہانی ہے ایک ایسی عورت کی، جس نے شہرت کے ساتھ ساتھ صدموں کے طوفان بھی جھیلے۔ مگر ہر امتحان کے بعد وہ پہلے سے مضبوط ہو کر سامنے آئیں۔ آج سنگیتا دوسروں کو یہی پیغام دیتی ہیں، اولاد پر سختی نہ کرو، پرانی غلطیوں کو مت دہراؤ، اور ہر حال میں حوصلہ قائم رکھو۔