آج کل ملک بھر میں سردی کی شدید لہر کی وجہ سے ہر شہر میں بچے نمونیا کا تیزی سے شکار ہورہے ہیں۔ اس آرٹیکل میں ہم اپنے قارئین کو نمونیا کے حوالے سے معلومات دیں گے کہ یہ مرض کیسے ہوتا ہے اور اس سے کیسے بچا جاسکتا ہے۔
نمونیا کیا ہے اور کیسے پھیلتا ہے؟
نمونیا وائرس یا بیکٹیریا اور فنجائی سے پھیلنے والا مرض ہے جو پھیپھڑوں میں پرورش پاتے ہیں اور پھیپھڑے کی تھیلیوں میں سوزش اور پیپ بننے لگتا ہے اور سانس لینے میں مشکل ہوتی ہے۔ اس کے لئے ضروری ہے کہ معمولی نزلے اور کھانسی کو نظر انداز نہ کیا جائے اور ایسے لوگوں سے بھی دور رہا جائے جن کو نزلہ اور کھانسی ہو کیوں کہ یہ بیماری ایک سے دوسرے شخص میں لگ جاتی ہے۔
علامات
نمونیا کی علامات میں بھوک نہ لگنا، کھانسی، گلے یں درد، تھکن، معدے اور پیٹ میں درد کے علاوہ بخار اور سردی لگنا جیسی علامات شامل ہیں۔
علاج
ایکسرے سے مرض کی تشخیص کے بعد ڈاکٹرز اینٹی وائرس اور اینٹی بیکٹیریل دوائیں تجویز کرتے ہیں البتہ اس کا بہترین حل یہی ہے کہ بچوں کو حفاظتی ٹیکوں کا کورس کروایا جائے اس کے علاوہ بڑے بھی انفلوئنزا کی ویکسین لگوا کر کسی حد تک مرض سے بچ سکتے ہیں۔ اگر پسلی چلنے کی شکایت ہو تو نیبولائز کریں اور سانس لینے میں دشواری کی صورت میں آکسیجن ماسک کا استعمال کریں۔
خوراک کیا دیں؟
مرہم ٹی وی کے مطابق سرد موسم میں بچوں اور بڑوں کو وائرل انفیکشن سے بچنے کے لئے کھٹی ٹھنڈی چیزوں سے پرہیز کرنا چاہیے اور غیر ضروری طور پر باہر بھی نہیں جانا چاہیے۔ جہاں تک اس مرض میں لی جانے والی خوراک کا سوال ہے تو مریض کو ایسی خوراک دی جائے جس سے پانی کی کمی دور ہو اس کے لئے ڈاکٹر کے مشورے سے گلوکوز، نمکول، یخنی اور سوپ وغیرہ دیا جاسکتا ہے اور زیادہ سے زیادہ آرام کرنا ضروری ہے۔