وہ لڑکی پوری طرح زیرو ہے اور۔۔ روبینہ اشرف کا علیزے شاہ کے خلاف زہر اگلتا ہوا بیان! صارفین نے بھی کھری کھری سنا دی

Netizen Calls Out Rubina Ashraf For Criticizing Alizeh Shah

اداکاری کی دنیا میں روشن چہرہ، بے باک آواز اور منفرد انداز رکھنے والی علیزے شاہ ایک بار پھر خبروں کی زینت بن گئیں، مگر اس بار وجہ ان کا کوئی نیا ڈرامہ یا اسٹائل نہیں بلکہ ایک پرانا زخم ہے جو دوبارہ تازہ ہو چکا ہے۔

نوجوان اداکارہ علیزے، جو پہلے ہی شوبز حلقوں کی جانب سے مسلسل تنقید اور بائیکاٹ کا شکار رہ چکی ہیں، اب ڈپریشن جیسے کرب سے گزر رہی ہیں۔ ان دنوں ان کے مداح اُن پر برسوں سے ہونے والی ناانصافیوں کو سامنے لانے میں مصروف ہیں۔

حال ہی میں ایک پرانا کلپ وائرل ہوا ہے، جس میں سینئر اداکارہ روبینہ اشرف علیزے شاہ کی اداکاری پر نہایت تلخ اور توہین آمیز تبصرہ کرتی نظر آتی ہیں۔

کلپ میں وہ علیزے کی عید ٹیلی فلم 'چاند رات اور چاندنی' پر بات کرتے ہوئے کہتی ہیں، میں نے اس لڑکی کو کئی ڈراموں میں دیکھا ہے۔ جو نمبر تم نے اسے دیے، وہ سب مصنف اور ہدایتکار کی محنت ہے۔ علیزے کا کریڈٹ اور ڈسکریڈٹ صرف میک اپ ہے۔ میرے لیے علیزے ایک مکمل صفر ہے۔ یہ صرف اس ڈرامے میں نہیں، بلکہ ہر کردار میں صفر ہے۔ نہ یہ اپنے کرلز سے باہر آتی ہے، نہ لپ اسٹک سے، نہ میک اپ سے۔ بس ایک ہی جیسا چہرہ۔"

یہ الفاظ منظر عام پر آتے ہی سوشل میڈیا پر آگ کی طرح پھیل گئے۔ صارفین روبینہ اشرف پر شدید تنقید کر رہے ہیں اور ان کے تبصرے کو علیزے شاہ کے خلاف ذاتی بغض قرار دے رہے ہیں۔

ایک صارف نے لکھا، اگر ہر میک اپ کرنے والی لڑکی کو صفر ملے تو سبھی اداکارائیں فیل ہو جائیں گی، روبینہ کا غصہ ذاتی لگتا ہے۔

دوسرا تبصرہ کچھ یوں تھا، یہ حسد ہے، کیونکہ ان کی اپنی بیٹی شکل و صورت میں عام سی ہے، اور علیزے خوبصورتی میں نمایاں ہے۔

کسی نے سوال اٹھایا، اگر مکالمے مصنف کا کمال ہیں اور پرفارمنس ہدایتکار کی، تو مرد اداکاروں کی تعریف کس بنیاد پر ہوتی ہے؟ یہ دوغلا پن کیوں؟

ایک مداح کی فریاد تھی، براہِ مہربانی علیزے شاہ کو مزید ذہنی اذیت نہ دیں، اس کے خلاف اس نفرت کو روکیے!

اب سوال یہ ہے کہ کیا خواتین کا خواتین کے خلاف اس قدر کڑوا رویہ ہونا درست ہے؟ کیا تنقید کا دائرہ صرف ظاہری شکل و صورت تک محدود ہونا چاہیے؟ یا پھر شوبز میں بھی انسانی جذبات، ذہنی صحت اور اخلاقیات کی گنجائش ہونی چاہیے؟