مشکل بہت تھا لیکن ۔۔ ایک گھریلو خاتون نے معمولی سی چیز کو کاروبار میں کیسے تبدیل کردیا؟

انسان کی زندگی میں مشکلیں چاہے کتنی بھی ہوں، بس ان مشکلوں کا مقابلہ کرنا آنا چاہیئے تب ہی جا کر آپ ایک کامیاب انسان بنتے ہیں۔ اسی طرح کچھ خواتین بھی ہوتی ہیں جن کے اپنے خواب ہوتے ہیں مگر شادی کے بعد وہ ادھورے رہ جاتے ہیں کیونکہ کہیں شوہر اجازت نہیں دیتا تو کہیں سسرال والے۔

لیکن کچھ باہمت خواتین ہوتی ہیں جو ہر چیلنج کا سامنا کرنے کو تیار ہوتی ہیں اور پھر کامیابی بھی انہیں مایوس نہیں کرتی، یہی وجہ ہے کہ ہم آپ کیلیئے ایسی خواتین کی نت نئے کہانیاں لاتے ہیں تا کہ آپ کی بھی حوصلہ افزائی ہو۔

یہ کہانی ہے کراچی کے علاقے گلستان جوہر سے تعلق رکھنے والی صابرہ کی، جنھوں نے اپنی صالحیتوں کو چار دیواری میں قید کرنے کے بجائے ان کو استعمال کرتے ہوئے ایک بلکل نئے کاروبار کا آغاز کیا۔

صابرہ نے شہرِ قائد میں ایک نئی ڈش متعارف کروائی ہے جو اس سے پہلے یہاں کے اسٹریٹ فوڈز کا حصہ نہیں تھی، اور وہ ہے "کارن ڈاگ" یہ مکئی کے بُھٹوں (چھلیوں) پر چاول، مچھلی کا گوشت، موزاریلا چیز وغیرہ لگا کر پیش کی جاتی ہے۔

صابرہ نے اس کام کے حوالے سے بات کرتے ہوئے بتایا کہ، انہیں بچپن سے ہی کھانے بنانے کا بہت شوق تھا اور وہ اکثر و بیشتر کوئی نہ کوئی نئی ڈش بنا کر ٹرائے کرتی تھیں جو ان کے گھر والوں اور آس پڑوس والوں کو بہت پسند آتی تھی۔ جب انھوں نے گھر پر پہلی بار کورین کورن ڈاگ بنائے تو سب نے ان کے اس نئے آئٹم کی بہت تعریف کی، اور اسکا کاروبار کرنے کا مشورہ دیا۔

وہ بتاتی ہیں کہ میرے بچوں نے میری کافی حوصلہ افزائی کی اور زور دیا کہ میں یہ کام شروع کروں، اگر وہ ایسا نہیں کرتے تو آج میں یہاں نہ ہوتی بلکہ گھر کے کچن میں ہی میری زندگی گزر جاتی۔

سب کی پُر زور خواہش اور کوشش کے بعد آخر صابرہ نے گلستان جوہر، کامران چورنگی کے قریب اپنا سٹال لگایا۔ جس میں مصطفٰی حنیف ٹرسٹ والوں نے انکی کافی مدد کی، اور کچھ چیزوں کا انتظام انھوں نے خود کیا۔

سابرہ نے اپنی شاپ کو "اسنیکس ٹو نائٹ" کا نام دیا ہے۔

انہوں نے بتایا کہ وہ زیادہ تر چیزیں گھر پر تیار کرتی ہیں، جبکہ کچھ کام وہ اپنے سٹال پر آ کے کرتی ہیں۔