کاروبار کھول کر موسیقی کو حرام کہہ دیا۔۔ جنید جمشید نے اس تنقید کا کیا جواب دیا تھا؟ جواد احمد کے انکشافات

Jawad Ahmed Calls Junaid Jamshed A Hypocrite

"جنید جمشید کا سب سے مشہور گانا دل دل پاکستان تھا، جو شعیب منصور نے بنایا تھا۔ وہ لوگ سب سے پہلے ٹی وی پر پاپ اسٹارز کی طرح آئے۔ اُس گانے سے اُس نے کروڑوں کمائے، اور اگر وہ آج ریلیز ہوتا تو اربوں کماتا۔ لیکن اچانک اُس نے راستہ بدلا، میوزک چھوڑ دیا اور تبلیغی بن گیا۔ آپ سب جانتے ہیں کہ تبلیغی جماعت اور مذہبی گروہ کتنے سخت ہوتے ہیں۔ اب اصل بات یہ ہے کہ اُس نے صرف میوزک نہیں چھوڑا بلکہ باقاعدہ پریس کانفرنس کر کے کہا کہ میوزک حرام ہے اور اُس نے سب دوستوں کو بھی کہا کہ چھوڑ دو۔ ہمارے ایک پروڈیوسر دوست محسن جعفر (پی ٹی وی سے) نے اُس سے کہا کہ ‘آپ نے ساری زندگی میوزک سے کمائی کی، پراپرٹی بنائی، یہاں تک کہ جے (J.) کے نام سے کپڑوں کا بزنس بھی میوزک کے پیسوں سے کھولا، اور اب آپ کہہ رہے ہیں کہ یہ حرام ہے؟’ جنید کے پاس کوئی جواب نہ تھا۔ اُس کا چہرہ سرخ ہوگیا، وہ غصے میں آگیا اور بولا کہ اُس نے ایک فتویٰ لیا ہے کہ جب توبہ کرلو تو سب حلال ہوجاتا ہے۔ آج لوگ اُسے ہیرو مانتے ہیں کہ اُس نے میوزک چھوڑ دیا، لیکن ساتھ ہی اُس کے گانے بھی سنتے ہیں، جو اُس کے لیے گناہ بن سکتے ہیں۔ اس لیے انسان کو اتنا سخت گیر نہیں ہونا چاہیے۔ مذہب کو ذاتی معاملہ رہنے دینا چاہیے۔ اس ملک میں پہلے ہی میوزک کو عزت کے ساتھ کرنا مشکل ہے۔"

پاکستانی گلوکار اور سیاستدان جاوید احمد ایک بار پھر خبروں میں ہیں۔ ایک پروگرام میں میزبان مریم امام سے گفتگو کرتے ہوئے انہوں نے مرحوم گلوکار جنید جمشید کے فیصلے پر کھل کر تنقید کی۔

جاوید احمد کا کہنا تھا کہ جنید جمشید نے دل دل پاکستان سے مقبولیت کی وہ بلندی حاصل کی جو بہت کم لوگوں کے حصے میں آتی ہے۔ مگر میوزک کو چھوڑنے کے بعد اُنہوں نے یہ اعلان کیا کہ میوزک اسلام میں حرام ہے، اور اپنے ساتھیوں کو بھی اسے ترک کرنے کا کہا۔ جاوید کے مطابق یہی رویہ سب سے زیادہ نقصان دہ ہے۔

انہوں نے مزید کہا کہ اگر کسی نے اپنا راستہ بدلنا ہے تو یہ اُس کا ذاتی معاملہ ہونا چاہیے، لیکن دوسروں پر اپنی سوچ مسلط کرنا درست نہیں۔ "یہ کیسا تضاد ہے کہ ایک طرف تو آپ نے اپنی کامیابی اور کاروبار میوزک سے بنایا، اور پھر اُسی کو حرام قرار دے کر دوسروں کو بھی روکنے لگے۔"

جاوید احمد کا یہ بیان سوشل میڈیا پر تیزی سے وائرل ہو رہا ہے۔ کچھ لوگ اُن کی بات سے متفق ہیں کہ مذہب کو ذاتی زندگی تک محدود رہنا چاہیے، جبکہ کچھ افراد کا کہنا ہے کہ جاوید احمد کو مرحوم گلوکار کے بارے میں اس طرح بات نہیں کرنی چاہیے تھی۔