جو ثناء کے ساتھ ہوا ویسا نہ ہو۔۔ سامعہ حجاب کو دھمکیاں دینے والا شخص گرفتار! ملزم زاہد کس طرح ٹک ٹاکر کو پریشان کرتا تھا؟

Influencer Samiya Hijab Faces Threat Like Sana Yousaf

اسلام آباد میں ٹک ٹاک کی دنیا سے جڑی ایک ہولناک کہانی نے سب کو چونکا دیا۔ مشہور ٹک ٹاکر سامعہ حجاب کو مبینہ طور پر ہراساں کرنے اور جان سے مارنے کی دھمکیاں دینے والا شخص حسن زاہد پولیس کی گرفت میں آ گیا۔

ذرائع کے مطابق، معاملے کا آغاز اُس وقت ہوا جب سامعہ حجاب نے لاہور کے رہائشی حسن زاہد کی شادی کی تجویز مسترد کی۔ اس انکار پر ملزم نے نہ صرف پیچھا کرنا شروع کیا بلکہ کئی بار دھمکیوں اور دباؤ کے ذریعے اُسے خوفزدہ کرنے کی کوشش کی۔ یہاں تک کہ ایک دن اسلام آباد میں سامعہ کی رہائشگاہ تک جا پہنچا، جہاں اُس نے زبردستی گاڑی میں بٹھانے کی ناکام کوشش بھی کی۔

سامعہ حجاب نے معاملے کی سنگینی کو دیکھتے ہوئے تھانہ شالیمار سے رجوع کیا اور ساتھ ہی سوشل میڈیا پر ویڈیو جاری کرتے ہوئے اپنی جان کو لاحق خطرات کا ذکر کیا۔ ویڈیو میں اُن کا کہنا تھا کہ اگر اُنہیں کچھ ہوا تو اس کا براہِ راست ذمہ دار صرف اور صرف حسن زاہد ہوگا۔

ٹک ٹاکر نے مزید بتایا کہ اُس وقت گھر میں صرف بیمار والدہ موجود تھیں جبکہ بھائی گھر پر نہیں تھا، جس کا ملزم نے فائدہ اٹھانے کی کوشش کی۔ یہ واقعہ اُس وقت مزید خوفناک ہو گیا جب سامعہ نے کھل کر بتایا کہ تین ماہ سے وہ شخص مسلسل اُس کے پیچھے لگا ہوا تھا۔

پولیس نے فوری ایکشن لیتے ہوئے حسن زاہد کو گرفتار کرلیا اور مقدمہ درج کر کے مزید تحقیقات شروع کر دی ہیں۔

یہ کیس نہ صرف ٹک ٹاک برادری بلکہ ہر اُس شخص کے لیے سبق ہے جو ہراسانی اور دھمکی جیسے جرائم کو معمولی سمجھ لیتا ہے۔