پاکستان میں ایک بہت بڑا طبقہ سگریٹ نوشی کا عادی ہے، ان میں کچھ لوگ کم پیتے ہیں تو کچھ چین اسموکر ہوتے ہیں یعنی جو ایک کے بعد ایک سگریٹ پیتے ہیں۔ اب جیسے کہ رمضان المبارک آگیا ہے اس میں یہ لوگ افطار کے فوراً بعد سگریٹ پینے باہر نکل جاتے ہیں کیونکہ ان کی نظر میں یہ ان کے دماغ کو سکون بخشتی ہے اور سارے دن کی تھکن ہلکی ہوجاتی ہے۔
لیکن کیا آپ جانتے ہیں سکون دینے کے بدلے میں یہ کسطرح آپ کی صحت چھین لیتی ہے؟ آئیے جانتے ہیں
حال ہی میں، ترکی میں گیرسن یونیورسٹی کے میڈیکل کالج میں شعبہ امراض قلب کے سربراہ ڈاکٹر قاغان قولان نے خبردار کیا ہے کہ، رمضان المبارک میں افطار کے فوری بعد سگریٹ نوشی کرنے سے دل کے مرض کے خطرات میں اضافہ ہوجاتا ہے۔
غیر ملکی رپورٹ کے مطابق ڈاکٹر قولان نے کہا کہ، جو لوگ افطار کے فوری بعد سگریٹ پیتے ہیں انہیں جسمانی جھٹکوں اور ہاتھ پاوں میں کپکپاہٹ کا سامنا کرنا پڑتا ہے اور اس کے علاوہ انہیں چکر بھی آتے ہیں۔ پورے دن کے بعد سگریٹ پینے سے جسم کا تمام مدافعتی نظام درہم برہم ہوجاتا ہے جبکہ تھوڑے وقفے سے سگریٹ پینے پر ایسا نہیں ہوتا۔
انہوں نے بتایا کہ رمضان میں سگریٹ نوشی سے خون کی شریانوں کی دیواروں کو شدید نقصان پہنچتا ہے جو باقی سال بھر پہنچے والے نقصان سے کہیں زیادہ ہوتا ہے۔
رمضان المبارک میں سیگریٹ چھوڑی جاسکتی ہے؟
بعض طبی تحقیقوں سے معلوم ہوتا ہے کہ رمضان میں دل سے متعلق امراض کے سبب اموات میں اضافہ ہوجاتا ہے اور اسی سلسلے میں سگریٹ نوشی بھی اچانک موت کا سبب بن سکتی ہے۔ ڈاکٹر قولان نے بتایا
انہوں نے زور دیا کہ رمضان کے مہینے سے فائدہ اٹھا کر سگریٹ نوشی ترک کرنے کا آغاز کیا جاسکتا ہے، کیونکہ جب آپ پورا دن اسکے بغیر رہ سکتے ہو تو آگے بھی بنا پیئے رہنا مشکل نہیں ہے۔ اسلیئے جتنا جلدی ہو سکے اس عادت سے پیچھا چھڑوائیں اور مختلف بیماریوں سے بچیں۔