شوہر کی بھی یہ تیسری شادی ہے.. پہلے شوہر 16 برس اور دوسرے 22 سال بڑے تھے! ریحام خان کے انکشافات

"میری پہلی شادی 16 برس بڑے شخص سے ہوئی جبکہ دوسرے شوہر اور میری عمر میں 22 سال کا فرق تھا لیکن کسی نے اس وقت ان دونوں مردوں کو طعنے نہیں دیے۔ اب جب میں نے اپنے سے کم عمر مرد سے شادی کی ہے تو اسے لوگوں نے طعنہ بنا دیا ہے"

یہ کہنا ہے صحافی ریحام خان کا جنھوں نے حال ہی میں حافظ احمد کے پوڈکاسٹ میں شرکت کی اور اپنی شادیوں کے متعلق کھل کر بات کی.

ریحام خان نے یہ انکشاف کیا کہ ان کے تیسرے شوہر مرزا بلال کی بھی یہ تیسری شادی ہے اور یہ شادی کرنے سے پہلے انہوں نے مرزا بلال کی دونوں سابقہ بیویوں کے طلاق نامے دیکھ کر ان کے طلاق یافتہ ہونے کی تصدیق کی تھی کیونکہ عام طور پر بعض مرد جھوٹ بولتے ہیں کہ ان کی طلاق ہوچکی ہے لیکن درحقیقت انہوں نے پہلی بیوی کو طلاق نہیں دی ہوتی اور وہ کسی دوسرے شہر یا ملک میں ہوتی ہے.

شوہر کو دوسری شادی کی اجازت دینے کے سوال پر ریحام خان نے دو ٹوک انداز میں کہا کہ وہ کسی مرد کو ایک شادی پر پابند کرنے کی قائل نہیں لیکن وہ ایک وقت میں ایک ہی بیوی رکھنے کی قائل ہیں. وہ اپنے شوہر کو بانٹ نہیں سکتیں اور اگر ان کے شوہر کو ایک اور شادی کرنی ہے تو پہلے انھیں ریحام خان کو چھوڑنا ہوگا.