میں مسلمان گھرانے میں پیدا ضرور ہوا لیکن ۔۔ حمزہ علی عباسی خود کو پیدائشی مسلم کیوں نہیں مانتے؟

"میں پیدائشی مسلمان نہیں ہوں، بلکہ میں خود کو شعوری مسلمان سمجھتا ہوں۔"

یہ کہنا تھا معروف اداکار حمزہ علی عباسی کا، جنہوں نے حال ہی میں بطور مہمان ایک پوڈکاسٹ میں شرکت کی۔

دین اسلام اور مذہب کے حوالے سے پوچھے گئے سوال پر انہوں نے جواب دیا کہ، ہاں میں ایک مسلمان گھرانے میں پیدا ہوا، میں پیدائشی مسلمان تھا لیکن اسلامی زندگی سے دور تھا۔ مگراب میں جو زندگی گزار رہا ہوں وہ میری اپنی مرضی ہے، میں نے تمام مذاہب کا مطالعہ کرنے کے بعد اسلام کا انتخاب کیا۔

حمزہ نے وضاحت کرتے ہوئے کہا کہ، میں خود کو پیدائشی طور پر مسلمان نہیں سمجھتا بلکہ شعوری مسلمان سمجھتا ہوں، جو دین کو سمجھ کر اس کی پیروی کرتا ہے۔

اسلامی بیان دینے پر ان کا کہنا تھا کہ، میں کوئی مذہبی اسکالر نہیں ہوں لیکن دین کی جو باتیں مجھے عقلی و شعوری طور پر ٹھیک لگتی ہیں اور سمجھ آتی ہیں میں ان پر عمل کرنے اور لوگوں تک پہنچانے کی کوشش کرتا ہوں۔

حمزہ نے واضح کیا کہ اسلام کے قریب آنے کے لیئے انہوں نے کسی بڑے حادثے یا واقعے کا انتظار نہیں کیا بلکہ ان کے ذہن میں کچھ سوال تھے جس کے جواب جانتے جانتے وہ اسلام کے قریب ہوگئے۔