ماں بننے والی خواتین کو اسٹرابیری کیوں کھانی چاہیے؟ کھٹے میٹھے پھل کے 5 حیرت انگیز فائدے

ٹھیلوں پر سجی سرخ چمکیلی اسٹرابیریز کو دیکھتے ہی کھانے کے لئے دل للچا اٹھتا ہے۔ یہ رسیلا کھٹا میٹھا پھل اس وقت مارکیٹ میں دستیاب ہے۔ اگرچہ اسٹرابیری کی قیمت تھوڑی زیادہ ہوتی ہے لیکن اس پھل کے فائدے اتنے ہیں جنھیں پڑھ کر لوگ اسے مہنگے داموں بھی ہاتھوں ہاتھ لیں گے۔

اسٹرابیری کی غذائی اہمیت

اسٹرابیری میں وٹامن سی بھرپور مقدار میں پایا جاتا ہے اس کے علاوہ مینگنیز، فولیٹ، پوٹاشیئم، فائبر، پروٹین، گڈ کاربز، کاپر، فاسفورس، وٹامن بی 6، وٹامن کے، وٹامن ای، آئرن اور میگنیشئم موجود ہوتا ہے۔

خواتین کو کیوں کھانی چاہیے؟

اسٹرابیری کے یوں تو کئی فائدے ہیں لیکن یہ بالخصوص خواتین کے لئے زیادہ مفید ہے کیوں کہ یہ ان کے جسم میں نسوانی ہارمونز میں اضافہ کرتا ہے اور عورتوں کے کئی امراض کا خاتمہ ہوتا ہے جن میں چہرے اور جسم میں اضافی بالوں کا مسئلہ بھی شامل ہے۔

بلڈ پریشر

اس چھوٹے سے پھل میں ایسے کئی اجزاء پائے جاتے ہیں جو خون کی روانی کو بہتر کرنے میں مددگار ہوتے ہیں جس سے بلڈ پریشر کے مرض پر قابو پانے میں مدد ملتی ہے۔

حاملہ خواتین کے لئے بہترین پھل

وہ خواتین جو ماں بننے کے عمل سے گزر رہی ہوں انھیں اسٹرابیریز کا استعمال بڑھادینا چاہیے۔ یہ نہ صرف خواتین بلکہ ان کے ہونے والے بچوں کے لئے بھی مفید ہے کیوں کہ اس میں حمل کے ابتدائی مہینوں میں بچوں کے دماغ، کھوپڑی اور ریڑھ کی ہڈی بنانے والے اہم جز فولیٹ پایا جاتا ہے۔ اس سے بچوں میں پیدائشی بیماریوں کا خطرہ کم ہوجاتا ہے۔

جگر کے امراض

اسٹرابیری خون صاف کرتی ہے۔ اس کے علاوہ ہیپاٹائٹس میں خالی پیٹ 2 سے 3 کپ نہار منہ اسٹرابیری کا جوس پینا مفید ہے۔ یہ جگر کو طاقت دیتا ہے اور قوت مدافعت بڑھاتا ہے۔

کولیسٹرول اور موٹاپا کم

اسٹرابیری میں اینٹی آکسیڈینٹس موجود ہوتے ہیں جن کی وجہ سے یہ دل کے امراض میں بھی مفید ہے اس کے علاوہ خون کا گاڑھا پن کم کرتا ہے۔ جسم سے کولیسٹرول کم کرتا ہے اور اضافی وزن کم کرنے میں مددگار ہے۔