محنت کرتی ہوں تاکہ پڑھائی اور گھر کا خرچہ اٹھا سکوں۔۔ خاتون رائیڈر نے اپنے کام کے حوالے سے کیا بتایا؟

“کوئی بھی کام مرد یا عورت کے لئے نہیں بنا۔ لوگ مجھ پر آوازیں کستے ہیں لیکن میں نظر انداز کردیتی ہوں۔ لڑکی کا صحیح کام کرنا غلط کیسے ہوسکتا ہے؟ شروع میں مجھے گھبراہٹ ہوتی تھی“

ہمت اور حوصلے کی مثال بننے والی اس لڑکی کا نام فرحین زہرا ہے۔ فرحین راول پنڈی کی رہائشی ہیں اور بی ایس کیمسٹری کے ٥ ویں سیمیسٹر کی طالبہ بھی ہیں۔ ان کا خواب ہے کہ وہ پڑھ لکھ کر ایئر فورس یا آٹامک کے شعبے میں خدمات سرانجام دیں اور اس کے لئے وہ دن رات محنت کرتی ہیں۔ فرحین صبح کالج جا کر علم حاصل کرتی ہیں اور رات کے وقت فوڈ ڈلیوری کا کام کارتی ہیں تاکہ اپنی تعلیم اور گھر کا خرچہ اٹھا سکیں۔

شوق روزگار بن گیا

انڈیپینڈینٹ اردو کو انٹرویو دیتے ہوئے فرحین نے بتایا کہ انھیں موٹر سائیکل چلانے کا بہت شوق تھا اسی وجہ سے 10 سال پہلے انھوں نے کزن سے موٹرسائیکل چلانی سیکھی اور پھر ان کا شوق ہی روزگار بن گیا۔ اور وہ فوڈ رائیڈر بن گئیں۔

واؤ یار تم بہت اچھا کا کررہی ہو

اپنے تجربے کے حوالے سے بات کرتے ہوئے فرحین کا کہنا تھا کہ پہلے دن گھبراہٹ کی وجہ سے وہ اپنے بھائی کو ساتھ لے گئیں۔ وہ کہتی ہیں انھوں نے جیسا سوچا تھا لوگوں کا ردعمل اس سے بہتر تھا۔ پہلا آرڈر دینے گئیں تو ایک خاتون نے دروازہ کھولا اور کہا کہ واؤ تم بہت اچھا کام کررہی ہو۔ یہ ایسا جملہ تھا جس نے فرحین کے حوصلے بلند کردئیے۔

لوگوں کی سوچ میں تبدیلی آگئی ہے

فرحین کہتی ہیں ان کے والد نے انھیں اجازت دی مگر لوگ کہتے ہیں کہ حالات ٹھیک نہیں جو کہ صحیح بھی ہے لیکن پھر بھی اب لوگوں کی سوچ میں تبدیلی آگئی ہے۔ نوکری کے ساتھ پڑھائی بہت مشکل ہوجاتی ہے لیکن ہر چیز ساتھ لے کر چلنا پڑتا ہے۔