خشک اور سرد موسم میں چہرے کی خوبصورتی برقرار رکھنے کے لیئے بہترین گھریلو فیس ماسک کون سے ہیں؟ بنانے کا طریقہ جان لیں

ہم میں سے اکثر لوگ سردیوں کے موسم میں اپنی جلد کو ہائیڈریٹ رکھنے کے لیے جدوجہد کرتے ہیں۔ سخت کوشش کے باوجود پانی کی مقدار کم ہو جاتی ہے جس کی وجہ سے اندرونی ہائیڈریشن کم ہو جاتی ہے۔ لہذا، آپ اپنی جلد کو پھیکا اور خشک نظر آنے سے روکنے کے لیے گھریلو نسخے بھی آزما سکتے ہیں۔

اس آرٹیکل میں، ہم آپ کے ساتھ تین گھریلو فیس ماسک کی ترکیبیں شیئر کریں گے جن پر عمل کرنا انتہائی آسان ہے اور یہ آپ کو ہموار اور چمکدار جلد حاصل کرنے میں مدد فراہم کریں گے۔

ایوکاڈو اور شہد کا ماسک:

ایک پکا ہوا ایوکاڈو لیں اور اسے ایک پیالے میں اچھی طرح میش کریں۔ پیسٹ بن جانے کے بعد، شہد شامل کریں اور دونوں اجزاء کو ایک ساتھ ملائیں۔ پھر بُرش کا استعمال کرتے ہوئے، ماسک کو چہرے پر لگائیں۔ آپ اپنی انگلیاں بھی استعمال کر سکتے ہیں۔ 15 سے 20 منٹ کے بعد سادے پانی سے دھو لیں۔

دہی اور جو کا ماسک:

سب سے پہلے 1 چمچ جو کو پیس کر موٹا سا پاؤڈر بنا لیں اور اس میں 2 چمچ سادہ دہی شامل کریں۔ دونوں کو ملا کر پیسٹ بنا لیں۔ ماسک لگاتے وقت اس سے اپنے چہرے پر ہلکے سے مساج کریں۔ پھر پانی سے دھونے سے پہلے اسے 15 منٹ تک منہ پر لگا رہنے دیں۔

کھیرا اور ایلو ویرا کا ماسک:

آدھے کھیرے کو چھلکا اتارے بغیر بڑے ٹکڑوں میں کاٹ کے بلینڈر میں ڈال کر پیس لیں۔ اس کے بعد ایک پیالے میں منتقل کریں اور اس میں 1 چمچ ایلو ویرا جیل شامل کر کے دونوں اجزاء کو مکس کریں۔ ماسک کو 15 منٹ تک اپنے چہرے پر لگائیں، اور دھولیں۔