کولڈ ڈرنک کی مٹھاس کینسر کا سبب بن سکتی ہے ۔۔ جانیں ماہرین نے کن چیزوں کے زیادہ استعمال سے لوگوں کو خبردار کردیا؟

کولڈ ڈرنکس کا استعمال ہماری روزمرہ زندگی کا حصہ بن گیا ہے لیکن کیا آپ جانتے ہیں کہ کولڈ ڈرنگ / سافٹ ڈرنک میں شامل مٹھاس کینسر کا سبب بھی بن سکتی ہے؟

جی ہاں! حال ہی میں عالمی ادارہ برائے صحت نے خبردار کیا ہے کہ سافٹ ڈرنکس بالخصوص سیاہ سافٹ ڈرنک میں شامل ایک مصنوعی مٹھاس " ایسپرٹیم" درحقیقت کینسر آور (کارسینوجن) کیمیکل ہے۔

ایسپرٹیم نامی مصنوعی مٹھاس بالخصوص بلیک کولڈ ڈرنک اور مشہور برانڈ کی چیونگم سمیت کئی اشیا میں شامل کی جاتی ہے۔ کولڈ ڈرنک سے لے کر چیونگم اور کچھ اسنیپل ڈرنکس تک کی مصنوعات میں استعمال ہونے والی اس مٹھاس کو پہلی بار کینسر کا سبب بتایا گیا ہے۔

یہ تحقیق بین الاقوامی ایجنسی برائے کینسر ریسرچ (آئی اے آرسی) نے کی ہے جو عالمی ادارہ برائے صحت کا ذیلی ادارہ بھی ہے۔

واضح رہے کہ آئی اے آر سی نے مختلف ماہرین پر مشتمل پینل سے مذاکرات کے بعد یہ فیصلہ کیا ہے۔ اس ضمن میں شائع شدہ تحقیقات کا جائزہ بھی لیا گیا ہے اور یوں ایسپرٹیم کو سرطان والی مٹھاس میں شامل کیا گیا ہے۔

ڈبلیو ایچ او ایسپرٹیم پر اپنی عوامی سماعت 14 جولائی کو کرے گا۔ اس اعلامیہ کے بعد مزید تفصیلات منظرِ عام پر آسکیں گی۔ تب تک عوام سے یہ درخواست کی گئی ہے کہ ان چیزوں کا استعمال کم سے کم کیا جائے۔