بیٹی کو سونا نہیں گاڑی دیں۔۔ بشریٰ انصاری کا جہیز سے متعلق نیا مشورہ! وجہ بھی بتا دی

Bushra Ansari Talks About Dowry

پاکستانی شوبز کی سینئر اور ہر دلعزیز فنکارہ بشریٰ انصاری نے جہیز کے رواج پر دو ٹوک رائے دیتے ہوئے والدین کو نہایت اہم نصیحت کی ہے۔ سوشل میڈیا پر وائرل ایک ویڈیو میں وہ کھل کر کہتی ہیں کہ زمانہ بدل چکا ہے، لہٰذا پرانے طریقے اب کارآمد نہیں رہے۔

بشریٰ انصاری کے مطابق بیٹیوں کو تعلیم دینا سب سے بڑی سرمایہ کاری ہے۔ ان کا کہنا تھا، مہنگے زیورات پر لاکھوں خرچ کرنے کی کوئی ضرورت نہیں، ہم سب وہ دور دیکھ چکے ہیں۔ اب وقت آگیا ہے کہ بچوں کو مضبوط بنایا جائے، انہیں پڑھایا جائے

انہوں نے والدین کو مشورہ دیتے ہوئے کہا کہ اگر اضافی رقم موجود ہو تو سونے کے بھاری سیٹ کی جگہ اپنی بچی کے لیے ایک گاڑی خرید لیں تاکہ وہ عملی زندگی میں اسے اپنی ضرورت کے مطابق استعمال کر سکے۔ ان کا کہنا تھا کہ یہ قدم نہ صرف بیٹی کو خود مختار بنائے گا بلکہ اس کی روزمرہ سہولت کے لیے بھی مددگار ہوگا۔

بشریٰ انصاری نے مزید کہا کہ بے شمار کپڑوں کا کوئی فائدہ نہیں، سائز بدلتے ہی سب بیکار ہوجاتا ہے۔ اگر شگون کے طور پر سونا دینا ضروری لگے تو بس ایک باریک چین یا چھوٹا سا تحفہ دے دیں، مگر اصل توجہ بیٹی کی تعلیم اور اس کے محفوظ مستقبل پر ہونی چاہیے۔