بچے کی بند ناک کھولنے والی یہ چیز کیا ہے؟ جانیں چھوٹے بچوں کی نزلے سے بند ناک کھولنے کا ایسا طریقہ جس سے ہو آپ کی بڑی مشکل آسان

بچوں کی ناک اکثر بہتے بہتے جم جاتی ہے جس کے بعد انھیں سانس لینے میں دشواری ہوتی ہے۔ بچے چونکہ خود اپنی ناک نہیں صاف کرسکتے اس لئے بڑوں کی ذمہ داری ہے کہ ان کی ناک اچھی طرح صاف کریں۔ آج ہم آپ کو اس کا ایک آسان طریقہ بتا رہے ہیں۔

بچے کی ناک کھولنے کے لئے درکار چیزیں

بچوں کی بند ناک کو کھولنے کے لئے 2 چیزوں کی ضروت ہوتی ہے۔ نیزل ڈراپس ( nasal drops) اور بلب سکر (bulb sucker) بلب سکر ایک چھوٹے پمپ کی طرح ہوتا ہے۔ اسے احتیاط سے استعمال کی ضرورت ہوتی ہے۔ یہ چیزیں میڈیکل اسٹور میں بآسانی دستیاب ہیں اور ان کی قیمت 350 سے شروع ہوتی ہے۔

استعمال کا طریقہ

سب سے پہلے بچے کو اس طرح لٹائیں کہ اس کا سر اور سینہ اونچا رہے۔ نیزل ڈراپ 2 یا 3 قطرے ایک نتھنے میں ڈالیں اور کچھ دیر کے لئے چھوڑ دیں تا کہ بچے کی ناک کے اندر دوا چلی جائے۔ اس کے بعد بلب سکر کو بچے سے دور رکھ کر پیچھے سے دبائیں تا کہ اس کی ساری ہوا نکل جائے۔ پھر سکر کو دبی ہوئی حالت میں دھیرے دھیرے بچے کے اس نتھنے میں ڈالیں جس میں دوا ڈالی گئی ہے اور بلب کو ہلکے ہلکے چھوڑیں۔ اس سے بلب بچے کی ناک کا سارا میل جذب کرلے گا۔ واش بیسن یا ڈسٹ بن میں بلب سے تمام میل جھاڑ دیں۔ یہی عمل ناک کے دوسرے نتھنے میں دہرائیں۔

ضروری ہدایات

یہ عمل بچے کی طبیعت کے مطابق دن میں 1 سے 3 بار کیا جاسکتا ہے۔ بچے کی ناک کی صفائی کے لئے ہمیشہ نرم کپڑے یا روئی کا استعمال کریں۔ اس کے علاوہ روزانہ بلب سکر کو اسٹیریلایز ضرور کریں۔ یعنی ابلتے ہوئے پانی میں بلب سکر 10 منٹ تک ڈال دیں اور پھر خشک کریں۔