آنکھوں کی سنگین بیماری کی ابتدائی علامات ۔۔ انہیں نظر انداز کرنا خطرناک ہوسکتا ہے

آنکھیں اللہ تعالٰی کی دی ہوئی ایک قیمتی نعمت ہیں ۔ اس کی حفاظت کرنا اس نعمت کا شکر ادا کرنا ہے۔ آج کل ہمارے یہاں موبائل، کمپوٹر اور لیپ ٹاپ کا استعمال بے تحاشہ بڑھ گیا ہے جس کی ریز(شعاعیں) آنکھوں کو بہت زیادہ نقصان پہنچانے کا سبب بن رہی ہیں۔ ہربچہ اس وقت موبائل اور دوسرے گیجٹس میں مصروف نظر آتا ہے۔ جس کی وجہ سے آنکھوں کی بیماریاں زیادہ پھیل رہی ہیں۔ اس لئے ضروری ہے کہ ان کے بارے میں کچھ معلومات بھی ہوں تاکہ علامات ظاہر ہوتے ہی ان کا سد باب کیا جاسکے۔ اس کے ساتھ ساتھ یہ بھی ضروری ہے کہ آپ اپنی آنکھوں کو صحت مند رکھیں تاکہ وہ کسی ضرورت مند کے کام آسکیں۔
تو آئیے جانتے ہیں آنکھوں سے متعلق ان بیماریوں کے بارے میں جنہیں نظر انداز نہیں کرنا چاہیے۔

1۔ مستقل سردرد:

سر درد کے پیچھے بہت سی وجوہات ہوسکتی ہیں۔ اس کے لیے دستیاب عام ادویات بھی اس درد سے نجات دلا سکتی ہیں۔ تاہم، اگر درد برقرار رہتا ہے اور اکثر ہوتا ہے، تو آپ کو یقینی طور پر آنکھوں کا معائنہ کروانا چاہیے۔ اس کی وجہ یہ ہے کہ یہ فوٹوکیریٹائٹس، مائیگرین اور قرنیہ کے انفیکشن کی علامت بھی ہو سکتی ہے۔

2۔ رات کو نظر نہ آنا:

ہماری آنکھ کی ساخت ایسی ہے کہ یہ کم روشنی والی جگہوں پر بھی موجود تمام روشنی کو جذب کر لیتی ہے۔ لیکن اگر آپ آنکھوں کی کسی بیماری میں مبتلا ہیں تو آپ کی آنکھیں پوری روشنی کو جذب نہیں کر پاتی ہیں اور اس سے رات کے اندھے پن کا مسئلہ پیدا ہو جاتا ہے۔ رات کو نظر نہ آنے کی وجہ موتیا ہو سکتا ہے۔

3۔ آنکھوں میں دھندلاہٹ:

اگر آنکھوں میں کوئی مسئلہ ہے، ٹھیک سے نظر نہیں آرہا تو چیک اپ کروانا ضروری ہے۔ یہ کسی سنگین بیماری کی علامت بھی ہو سکتی ہے۔ یہ جزوی یا مکمل اندھا پن کا سبب بن سکتا ہے۔

4۔ آنکھوں کے ارد گرد سوجن

سوجن گردن، چہرے یا سر پر الرجی یا صدمے کا نتیجہ ہو سکتی ہے۔ یہ عام طور پر زیادہ دیر تک نہیں رہتی، تاہم، اگر ایسا ہوتا ہے، تو ڈاکٹر سے مشورہ کریں اور اپنی آنکھوں کی جانچ کروائیں۔ کیونکہ یہ سوجن آنکھوں کی سنگین بیماری کا پیش خیمہ ہو سکتی ہے۔