پھل نہیں طاقت اور صحت کا خزانہ ۔۔ جانیئے امرود کے صحت پر حیرت انگیز فوائد

امرود ایک ایسا پھل ہے جو بچوں بڑوں سب کو ہی پسند ہوتا ہے اور اس کا کھٹا میٹھا سا ذائقہ سب کے دل جیت لیتا ہے، ساتھ ہی قدرت نے اس میں بےشمار غذائی اجزاء اور فوائد چھُپا رکھے ہیں، اس لئے امرود کا استعمال ہماری صحت کے لئے بےحد مفید ہے۔
آیئے اس بہترین پھل کے حیرت انگیز فوائد پر نظر ڈالتے ہیں تاکہ اب آپ بھی امرود کا استعمال کریں اور بھرپور فائدہ اُٹھائیں۔

• امرود کے حیرت انگیز فوائد

یہ ہلکے سبز یا پیلے رنگ والے پھل کے بیج بھی کھائے جاسکتے ہیں بلکہ اس کے پتے بھی ہربل چائے کے طور پر استعمال کیے جاسکتے ہیں امرود وٹامن سی سے بھرپور ہوتا ہے یہ پھل کتنے فوائد کا حامل ہے آئیے جانتے ہیں۔

• ذیابطیس میں مفید

جو افراد ذیابطیس کا شکار ہوں ان کے لئے امرود کا استعمال بےحد مفید ہے فائبر سے بھرپور ہونے کی وجہ سے امرود ذیابیطس کو بڑھنے سے روکتا ہے اور بلڈ شوگر کی سطح کو ریگولیٹ کرتا ہے۔

• کینسر کے خلاف حفاظت کرے

امرود کے استعمال کینسر کے جراثیم کو پیدا ہونے سے روکتا ہے امرود میں موجود وٹامن سی، لائیکو پین اور دیگر اجزاء ایسے اینٹی آکسائیڈنٹس کا کام کرتے ہیں جو کینسر کے خلیات کی نشونما نہیں ہونے دیتے۔

• قبض دور کرنے کے لئے بہترین

امرود کا سب سے مشہور اور سب سے بہترین فائدہ یہ ہے کہ امرود قبض دور کرنے اور نظامِ ہاضمہ کو بہتر بنانے کے لئے بےحد فائدے مند ہے امرود میں فائبر کی وافر مقدار موجود ہوتی ہے جس سے نظامِ ہاضمہ درست رہنے میں مدد ملتی ہے ایک امرود ہی فائبر کی روزانہ کے لیے ضروری مقدار کا 12 فیصد حصہ جسم کو فراہم کردیتا ہے جو کہ نظام ہضم کے لیے بہت زیادہ فائدہ مند ہے اس کے بیج قبض توڑنے میں اہم کردار ادا کرتے ہیں۔

• حاملہ خواتین کے لئے مفید

امرود میں فولک ایسڈ کی وافر مقدار پائی جاتی ہے اس لئے ماہرین حاملہ خواتین کو امرود کے استعمال کا مشورہ دیتے ہیں کیونکہ حاملہ خواتین کے لئے امرود بےحد فائدے مند اور ضروری ہوتا ہے۔

• بینائی بہتر بنائے

آنکھوں کو طاقتور بنانے اور نظر کی کمزور کو دور کرنے کے لئے وٹامن اے بےحد ضروری ہوتا ہے اور امرود میں وٹامن اے کی وافر مقدار پائی جاتی ہے، یہ پھل نہ صرف عمر بڑھنے کے ساتھ بینائی میں آنے والی کمزوری سے تحفظ دیتا ہے بلکہ اسے بہتر بھی کرتا ہے۔

• دانتوں کا درد دور کرے

امرود میں ورم کش اور درد کش خصوصیات موجود ہوتی ہیں جراثیم کش ہونے کی وجہ سے بھی یہ انفیکشن کے خلاف لڑتا ہے یہ منہ کے جراثیم مارنے کی صلاحیت رکھتا ہے، امرود کھانا دانت کے درد کے لئے گھریلو ٹوٹکہ مانا جاتا ہے۔

• ذہنی افعال کو متحرک کرے

امرود میں ذہنی افعال کو متحرک کرنے کی خصوصیت موجود ہوتی ہے امرود میں وٹامن بی تھری اور بی سکس بھی موجود ہے جو کہ دماغ کی جانب خون کی فراہمی کو بہتر بناتے ہیں ذہنی افعال کو متحرک کرتے ہیں اور اعصاب کو پُرسکون بناتے ہیں۔ لہذا دن بھر کے کاموں کے بعد اسے کھانے سے مسلز کو سکون ملتا ہے، ذہنی تناﺅ کم ہوتا ہے جبکہ جسمانی توانائی بڑھتی ہے امرود پر اگر کالی مرچ چھڑک کر کھایا تو اس کا ذائقہ اور افادیت مزید بڑھ جاتی ہے۔

• وزن کم کرنے کے لئے مفید

اگر آپ اپنا وزن تیزی سے کم کرنا چاہتے ہیں تو آج ہی سے امرود کا استعمال شروع کر دیں، اس کے استعمال سے جہاں نظامِ ہاضمہ تیز ہوتا وہیں اس میں موجود فائبر اور پروٹینز، وٹامنز میٹابولزم کو بڑھائیں گے اور وزن کم کرنے میں مدد فراہم کریں گے امرود کا استعمال دل کی صحت کے لئے بھی بہترین ہے یہ پھل صحت کے لیے نقصان دہ کولیسٹرول کا خاتمہ کرتا ہے اور بلڈ پریشر کو کنٹرول کرتا ہے۔