وہ ایسا ظلم کرتی ہیں جن کا ہم تصور بھی نہیں کر سکتے۔۔ شہریار منور نے خواتین کے بارے میں ایسا کیوں بولا؟

حال ہی میں پاکستانی اداکار شہریار منور کی ایک پرانی ویڈیو کلپ سوشل میڈیا پر وائرل ہوئی ہے، جس میں وہ مرد اور خواتین کے درمیان ہونے والے گھریلو تشدد کے بارے میں بات کرتے دکھائی دے رہے ہیں۔

جس میں ان کا کہنا تھا کہ، ہمارے معاشرے میں صرف خواتین ہی مردوں کے ظلم کا شکار نہیں ہیں بلکہ بہت سے مرد بھی خواتین کے ظلم کا شکار ہیں۔ وہ ایسا ظلم کرتی ہیں جن کا ہم تصور بھی نہیں کر سکتے۔

اپنی بات کی وضاحت دیتے ہوئے انہوں نے کہا کہ، ہمارے یہاں مردوں کو بچپن سے ہی رونے نہیں دیا جاتا اور اُنہیں یہ سکھایا جاتا ہے کہ مرد کو درد نہیں ہوتا اور وہ کبھی نہیں روتا۔

شہریار منور نے مزید کہا کہ، پھر جب ان کی شادی ہوتی ہے تو ان کی بیویاں ان کو اپنے جذبات کا اظہار نہیں کرنے دیتیں، وہ شوہروں سے اکثر اسی انداز میں بات کرتی ہیں کہ اگر نوکری چلی گئی تو کیا ہوا آپ جلدی کوئی دوسرا کام شروع کر لینا۔ مردوں پر جب بہت ساری ذمہ داریاں ڈال دی جاتی ہیں اور اُنہیں اپنے جذبات بیان کرنے کا موقع نہیں ملتا تو ان کی شخصیت میں مسائل پیدا ہوتے ہیں۔

اداکار کا کہنا تھا کہ، اب جب مرد کو درد نہیں ہوتا اور مرد روتا نہیں ہے تو پھر وہ جذباتی طور پر تنہا ہوجاتا ہے اور ایسی صورتحال میں کئی کیسز میں شادی کے بعد مرد اپنی بیویوں پر تشدد بھی کرتے ہیں۔