صرف بھابھیاں ہی نہیں لڑتیں، بلکہ۔۔ آمنہ ملک نے جوائنٹ فیملی سسٹم کی حقیقت کھول کے رکھ دی

Amna Malik Shares Her Views On Joint Family System

اداکارہ، ماڈل اور میزبان آمنہ ملک طویل عرصے سے شوبز انڈسٹری کا حصہ ہیں اور اپنی شاندار اداکاری سے ناظرین کے دل جیت چکی ہیں۔ حال ہی میں وہ ڈرامہ جما تقسیم میں راشدہ کے کردار میں جلوہ گر ہیں، جو مداحوں کی خاص توجہ حاصل کر چکا ہے۔

آمنہ ملک کا کردار راشدہ، ایک ایسی عورت کا عکس ہے جو زندگی بھر ظلم، جبر اور پابندیوں میں گھری رہی۔ دو بیٹیوں کی ماں ہونے کے باوجود وہ کبھی خود کو آزاد محسوس نہیں کر سکی۔ اب وہ ایک ایسے سفر پر گامزن ہے جہاں اسے اپنی پہچان اور ہمت تلاش کرنی ہے — ایک ایسی عورت جو کبھی دبی ہوئی تھی، اب خود کو پہچاننے لگی ہے۔

دلچسپ بات یہ ہے کہ حقیقی زندگی میں آمنہ ملک، راشدہ کے بالکل برعکس ہیں۔ حال ہی میں وہ پروگرام ہسنا منع ہے، میں شریک ہوئیں جہاں انہوں نے جوائنٹ فیملی بمقابلہ نیوکلیئر فیملی پر اپنی رائے کا اظہار کیا۔

ان کا کہنا تھا کہ مشترکہ خاندانی نظام میں رہنا غلط نہیں، بلکہ یہ محبت اور جڑے رہنے کا ذریعہ ہوتا ہے۔ مگر وقت کے ساتھ جیسے ہی بہن بھائیوں کے بچے بڑے ہوتے ہیں، جگہ کی کمی اور ذاتی مصروفیات مسائل پیدا کر دیتی ہیں۔

آمنہ کے مطابق، صرف بھابھیاں ہی نہیں لڑتیں، بعض اوقات بہن بھائیوں میں بھی تلخیاں آ جاتی ہیں، اس لیے تھوڑا فاصلہ رکھنا ضروری ہے تاکہ محبت برقرار رہے۔

آمنہ ملک نے نہ صرف اپنے کردار سے ناظرین کے دلوں کو چھوا ہے بلکہ اپنے سمجھدار خیالات سے ایک بار پھر ثابت کر دیا کہ وہ صرف باصلاحیت اداکارہ ہی نہیں بلکہ زندگی کو گہرائی سے سمجھنے والی عورت بھی ہیں۔