امر خان کو اداکار وہاج علی کی کونسی عادت پسند آگئی؟ اداکارہ نے انکشاف کردیا

امر خان ایک مقبول پاکستانی اداکارہ ہیں جو اکثر سوشل میڈیا پر متحرک دکھائی دیتی ہیں۔ اداکارہ کا پاکستان انڈسٹری کے مشہور اداکار وہاج علی سے متعلق حالیہ بیان سوشل میڈیا پر کافی وائرل ہو رہا ہے۔

حال ہی میں امر خان نے اداکار و میزبان احمد علی بٹ کے پوڈ کاسٹ میں بطور مہمان شرکت کی جہاں انہوں نے مختلف موضوعات پر گفتگو کی۔

امر خان نے وہاج علی کی تعریف کرتے ہوئے کہا کہ وہاج شہرت کی بلندیوں اور اونچائیوں پر پہنچنے کے بعد بھی انتہائی عاجز مزاج انسان ہیں، ان کی جیسی عاجزی اور شخصیت باقی اداکاروں میں نہیں دیکھی۔

انٹرویو کے دوران میزبان نے اداکارہ سے ساتھی فنکاروں کے حوالے سے سوال کئے جس پر امر خان فہد مصطفیٰ اور وہاج علی کے گُن گانے لگیں۔

انٹرویو کے دوران ایک سوال کا جواب دیتے ہوئے انہوں نے فہد مصطفیٰ کے ساتھ کام کرنے کی خواہش کا اظہار کیا۔

انہوں نے کہا کہ اگر مجھ سے پوچھا جائے کہ کس اداکار کے ساتھ مجھے فلم میں کاسٹ کیا جائے تو میں فہد مصطفیٰ کا ہی نام لوں گی کیونکہ اس وقت وہ ہی ایک اداکار ہیں جو کردار ادا کرنے میں جان لگا دیتے ہیں۔

دوران انٹرویو اداکارہ سے میزبان نے جب ساتھی فنکار وہاج علی کے حوالے سے سوال کیا تو انہوں نے وہاج علی کی تعریفوں کے پُل باندھ دیئے۔

اداکارہ وہاج علی کے رویے اور شخصیت کی گرویدہ نظر آئیں۔

ان کے خیال میں شہرت حاصل کرنے کے بعد وہاج علی میں باقی اداکاروں کی تمیز اور عزت بھی آگئی ہے، وہ جتنی شہرت کی بلندیوں پر ہیں، اتنے ہی عاجز مزاج ہیں۔

اداکارہ کی جانب سے وہاج علی کی اتنی تعریفیں کیے جانے کی ویڈیو وائرل ہوگئی اور صارفین نے ان سے اتفاق کرتے ہوئے اداکار کی شخصیت کو خوب سراہا۔