سب ٹیسٹ صحیح آتے ہیں پھر بھی ماں نہیں بن پاتی ۔۔ غیر واضح بانجھ پن کیا ہوتا ہے! جانیں ماہرین اس کا کیا حل بتاتے ہیں؟

والدین بننے کا خواب دیکھنے والے جوڑے اکثر خود کو بانجھ پن کی مشکل کا سامنا کرتے ہوئے پاتے ہیں۔ اکثر ایسا ہوتا ہے کہ ٹیسٹ تو ٹھیک آتے ہیں لیکن پھر بھی حمل نہیں ٹہرتا۔ میاں بیوی خود کو بانجھ جوڑا سمجھ کر نامیدی کی طرف چلے جاتے ہیں۔ آج ہم بھارت کی مشہور گائناکولوجسٹ ڈاکٹر گوری اگروال کے اس حوالے سے دی گئی معلومات کے بارے میں بتائیں گے کہ وہ کون سی تدابیر ہیں جنھیں اپنا کر اس مسئلے کو حل کیا جاسکتا ہے۔

غیر واضح بانجھ پن کی تعریف

غیر واضح بانجھ پن سے مراد ایسے معاملات ہیں جہاں معیاری زرخیزی ٹیسٹ میاں بیوی دونوں کے نارمل آتے ہیں لیکن پھر بھی حمل نہیں ٹہرتا۔

پیچیدہ تعامل

ڈاکٹر اگروال نے اس بات پر زور دیا کہ انسانی زرخیزی مختلف عوامل کا ایک پیچیدہ عمل ہے۔ مرد کے اسپرم کی صرف تعداد ہی نہیں بلکہ کوالٹی بھی اہمیت رکھتی ہے جب کہ دوسری طرف عورت کے جسم میں بننے والے انڈے کا معیار بھی اچھا ہونا چاہیے۔ اکثر عورت کی بچہ دانی کی ساخت مناسب نہیں ہوتی جس کی وجہ سے حمل میں مسائل ہوتے ہیں۔ یہ وہ باتیں ہیں جو عام طور پر کیے جانے والے ٹیسٹ میں سامنے نہیں آتیں۔ لیکن بے اولاد جوڑوں کو اس حوالے سے ڈاکٹر سے رجوع کرنا چاہیے۔

تناؤ اور طرز زندگی

تناؤ، اضطراب اور طرز زندگی زرخیزی میں اہم کردار ادا کر سکتے ہیں۔ ڈاکٹر اگروال نے تناؤ کی سطح اور ہارمونل عدم توازن کے درمیان تعلق پر روشنی ڈالی جو حمل میں رکاوٹ بن سکتی ہے۔ مزید یہ کہ طرز زندگی کے انتخاب جیسے خوراک، ورزش اور نیند کی کمی بھی تولیدی صحت کو متاثر کر سکتی ہے۔

علاج کے طریقے

ڈاکٹر اگروال نے غیر واضح بانجھ پن کے علاج کے لیے ایک جامع طریقہ کار پر گفتگو کرتے ہوئے بتایا کہ اس مسئلے کے علاج میں نہ صرف طبی مشورے شامل ہیں بلکہ زرخیزی کی دوائیں اور معاون تولیدی تکنیکیں اس کے علاوہ تناؤ کو کم کرنے کی تکنیک، مشاورت اور طرز زندگی میں تبدیلیوں کے حوالے سے مشورے بھی شامل ہیں۔ اس کے علاوہ آئی وی ایف کے زریعے بھی بے اولادی کے مسئلے کا حل نکالا جاسکتا ہے۔