میرے گھر والے نہیں مان رہے تھے لیکن.. ضیاء محی الدین کی 2 شادیوں اور عمر کے فرق کے باوجود عذرا محی الدین نے ان سے شادی کیوں کی؟

"مشہور گلوکارہ ٹینا ثانی میری دوست ہیں. ایک دن ان کے گھر پروگرام میں ضیا محی الدین بھی موجود تھے اور اتفاق سے واپسی پر انھوں نے مجھے گھر ڈراپ کیا۔ ہماری تھوڑی بہت بات چیت ہوئی. اس سے اگلے روز ضیاء میرے بارے میں معلومات کے لیے ٹینا ثانی کے گھر گئے. اس کے بعد ضیاء نے مجھے فون پر شادی کیلئے پرپوز کیا"

یہ کہنا ہے اداکارہ عذرا محی الدین کا جنھوں نے ایک انٹرویو میں تھیٹر کی دنیا کے لیجنڈ ضیاء محی الدین سے اپنی شادی کا دلچسپ قصہ سنایا.

عذرا محی الدین کا کہنا تھا کہ ہم دونوں کی عمر میں کافی فرق تھا اس وجہ سے میرے گھر والے ہماری شادی کے لیے نہیں مان رہے تھے. اس کے علاوہ ضیاء پہلے بھی دو شادیاں کر چکے تھے اور بچے بھی تھے۔ لیکن میں ضیاء سے شادی کرنا چاہتی تھی. اس لئے اپنے بڑے بھائی سے بات کی اور پھر انہوں نے گھر والوں کو راضی کیا اس طرح ہماری شادی ہوگئی.

عذرا محی الدین کا کہنا تھا کہ مجھے روایتی شوہر پسند نہیں تھے اور ہمیشہ سے ایسے ساتھی کی تلاش تھی، جس کے ساتھ ذہنی ہم آہنگی ہو اور دوستی والا رشتہ بن سکے یہی وجہ تھی کہ میں بھی ضیاء محی الدین سے شادی کرنا چاہتی تھی.

"ہماری شادی 1994 میں ہوئی اور شادی کے 6 برس بعد ہماری بیٹی ہوئی جو اب بیرون ِملک تعلیم حاصل کررہی ہے۔ ضیاء کے دنیا سے جانے کے بعد بیٹی کی ذمے داری میرے کاندھوں پر ہے جو میں پوری کروں گی.