شدید سر درد کو منٹوں میں دور کیسے بھگائیں؟ ڈاکٹر ام راحیل نے بتایا ایسا طریقہ جس سے صرف 7 منٹ میں سر درد سے ملے نجات

سر درد ایسا مسئلہ ہے جو بڑوں تو بڑوں آج کل کے بچوں کو بھی ہوجاتا ہے۔ اس میں اتنی تکلیف ہوتی ہے کہ درد سے نڈھال شخص آنکھیں بھی نہیں کھول پاتا اور پھر اگر یہ درد کام کے دوران شروع ہوجائے تو کام بھی ادھورے رہ جاتے ہیں۔ آج کے اس آرٹیکل میں ہم آپ کو سر درد سے نجات کا ایسا فوری طریقہ بتائیں گے جس میں کسی دوا یا کیمیکل کے بجائے باورچی خانے کی عام اور ہربل چیزوں کا استعمال کیا جائے گا۔

مشہور ڈاکٹر ام راحیل نے اپنے وی لاگ میں بتایا کہ اگر کسی کو اچانک سر میں درد شروع ہوجائے تو باورچی خانے میں رکھی دو بڑی الائچی کے دانے نکالیں اور اسے ایک چائے کا چمچ چینی میں ملا کر چبائیں اور دھیرے دھیرے اس کا عرق حلق میں اتاریں۔ یہ عمل تقریبا 7 سے 8 منٹ تک کریں۔ اس سے بغیر دوا کے سر کا درد کم ہوجائے گا۔

ذیابیطس کے مریضوں کے لئے

وہ لوگ جو چینی سے پرہیز کررہے ہیں یا پھر ذیابیطس کا شکار ہیں انھیں چاہئے کہ دو بڑی الائچی میں 10 سے 12 پتیاں پودینے کی ڈالیں اور بالکل چھوٹا سا ادرک کا ٹکڑا ملا کر 7 سے 8 منٹ تک چبائیں۔ اس سے بھی سر کا درد جاتا رہے گا۔ البتہ یہ مستقل علاج نہیں ہے۔ اگر سر درد ہورہا ہو تو اس کے پیچھے نگاہوں کی کمزوری یا کوئی سنجیدہ مسئلہ ہوسکتا ہے۔ لہذا اسے فوری چیک کروائیں۔