یوٹیوب بند ہوگیا تو آپ کیا کریں گے فہد تو پھر بھی کام پر جائے گا۔۔ رجب بٹ کی تنقید پر شمعون عباسی بھی کود پڑے ! آڑے ہاتھوں لے لیا

Shamoon Abbasi on Rajab Butt Statement Against Fahad Mustafa

"میں یہ کہنا چاہتا ہوں کہ فہد مصطفیٰ ایک بڑا نام ہے۔ وہ پچھلے 20 سالوں سے انڈسٹری کا حصہ ہیں۔ ایک اداکار اپنی محنت اور کام کی بدولت ہر شعبے میں فین بناتا ہے۔ اداکار صبح سویرے گھر سے نکل کر کام، لوکیشنز اور ادائیگیوں کی تلاش میں رہتا ہے۔ ان کا معمول انتہائی سخت اور تھکا دینے والا ہوتا ہے، مگر آپ کے لیے اسے سمجھنا مشکل ہے۔ میں یہ نہیں کہہ رہا کہ آپ کمتر ہیں، لیکن جس انداز میں آپ تکبر سے بات کرتے ہیں، وہ مثبت نہیں ہے۔ تمام ڈیجیٹل کریئیٹرز، چاہے وہ یوٹیوب، ٹک ٹاک یا انسٹاگرام پر کام کر رہے ہوں، وہ انہی پلیٹ فارمز پر انحصار کرتے ہیں۔ خدا نہ کرے اگر یہ پلیٹ فارمز بند ہو جائیں، تو آپ کیا کریں گے؟ مگر فہد مصطفیٰ پھر بھی اپنے کام پر جائیں گے۔"

پاکستانی شوبز انڈسٹری کے معروف اداکار شمعون عباسی نے حال ہی میں راجب بٹ کے فہد مصطفیٰ پر دئیے گئے بیان پر ردعمل دیا ہے، جس میں انہوں نے نہایت عاجزی مگر مضبوط لہجے میں یوٹیوبر کو آئینہ دکھایا۔

یہ تنازع اس وقت شروع ہوا جب فہد مصطفیٰ نے فیملی وی لاگرز پر تنقید کرتے ہوئے کہا کہ "یہ لوگ اپنی فیملیز کو بیچ کر کنٹینٹ بنا رہے ہیں۔" اس پر راجب بٹ نے فہد مصطفیٰ کو پہچاننے سے ہی انکار کر دیا اور ساتھ ہی کہا کہ وہ ایسے افراد کی عزت نہیں کر سکتے جو سینئرز کی طرح برتاؤ نہیں کرتے۔

شمعون عباسی نے اپنے بیان میں راجب بٹ کو آڑے ہاتھوں لیتے ہوئے کہا کہ ایک اداکار برسوں کی محنت، جدوجہد اور سخت روٹین کے بعد اپنا مقام حاصل کرتا ہے، جبکہ ڈیجیٹل کریئیٹرز کا تمام انحصار سوشل میڈیا پلیٹ فارمز پر ہوتا ہے۔

انہوں نے مزید کہا کہ اگر کبھی یوٹیوب، انسٹاگرام یا ٹک ٹاک بند ہو جائے، تو ایسے کریئیٹرز کے پاس کچھ نہیں بچے گا، مگر ایک اداکار، چاہے کچھ بھی ہو جائے، اپنے کام پر جائے گا۔

یہ بیان سامنے آتے ہی سوشل میڈیا پر زبردست بحث چھڑ گئی۔ کچھ صارفین نے شمعون عباسی کی حمایت کی اور کہا کہ اداکاری ایک باوقار پیشہ ہے، جبکہ کچھ نے راجب بٹ کے مؤقف کی تائید کرتے ہوئے کہا کہ ڈیجیٹل کریئیٹرز بھی آج کے دور میں ایک انڈسٹری کا حصہ بن چکے ہیں۔