اللّٰہ سے معافی مانگی اور ڈوپٹہ اتار دیا۔۔ نوشین شاہ کی حجاب کرنے اور پھر چھوڑنے کی وجہ کیا تھی؟ حیرت انگیز انکشاف

Nausheen Shah Reveals Why She Removed Her Hijab

پاکستان کی نامور ماڈل و اداکارہ نوشین شاہ ہمیشہ اپنی شاندار اداکاری اور مضبوط اسکرین پریزنس کے باعث توجہ کا مرکز رہی ہیں، لیکن اس بار وہ ایک بالکل مختلف وجہ سے سرخیوں میں ہیں۔

فریحہ الطاف کے پوڈکاسٹ میں شرکت کے دوران نوشین شاہ نے اپنی اندرونی کشمکش، حجاب کے تجربے اور روحانیت کی طرف واپسی پر دل کھول کر بات کی۔

نوشین نے بتایا کہ ان کی زندگی میں ایک وقت ایسا آیا جب ایک خواب نے انہیں ہلا کر رکھ دیا۔ ان کے بقول؛

"میں نے خواب میں خود کو اپنی والدہ اور بڑے بھائی کے ساتھ چلتے دیکھا۔ اچانک ایک آواز آئی ’اگر تم نے سر نہ ڈھانپا تو فرشتے تم سے دور ہو جائیں گے۔‘ میں گھبرا کر جاگی اور فوراً دوپٹہ اوڑھ لیا۔ چار ماہ تک ہر جگہ، ہر شوٹ پر، وہ میرے ساتھ رہا۔"

لیکن چند ماہ بعد انہیں احساس ہوا کہ وہ دو مختلف زندگیاں گزار رہی ہیں— گھرمیں سر ڈھانپے ایک باوقار عورت، جبکہ کام پر ایک بالکل جدید روپ۔ یہی تضاد ان کے ذہن میں سوالات لے آیا۔

میں نے خود سے پوچھا، آخر میں کس راستے پر ہوں؟ میں نے اسی لمحے اللہ سے معافی مانگی اور دوپٹہ چھوڑنے کا فیصلہ کیا۔ حالانکہ مجھے اسے پہننا پسند تھا اور میں خوبصورتی سے اسٹائل بھی کرتی تھی، مگر میں جھوٹا بوجھ نہیں اٹھانا چاہتی تھی۔

روحانیت کا ذکر کرتے ہوئے ان کا لہجہ مزید پرسکون ہوگیا، میں بارہا اللہ سے دعا کرتی تھی کہ مجھے اپنی طرف بلا لو۔ اگر تُو مجھ سے محبت کرتا ہے تو مجھے سجدے کی طرف کھینچ لے۔

نوشین کہتی ہیں کہ اللہ نے ان کی دعا سن لی، اور اب وہ باقاعدگی سے نماز ادا کرتی ہیں۔ یہ میری ذات کی مضبوطی ہے۔ نماز انسان کو نظم سکھاتی ہے، برے راستوں سے بچاتی ہے اور بے شمار نقصانوں سے حفاظت کرتی ہے۔

نوشین شاہ کی یہ گفتگو اس بات کی مثال ہے کہ ہر شخص کا روحانی سفر منفرد ہوتا ہے—کبھی ایک خواب راستہ بدل دیتا ہے اور کبھی ایک سوال پوری زندگی واضح کر دیتا ہے۔