شردھا کپور نے سلمان خان کے ساتھ کون سی فلم کرنے سے منع کیا؟ سنہری موقع گنوانے کے بعد اداکارہ نے وجہ بتا دی

سلمان خان بالی ووڈ کے وہ سپر اسٹار ہیں جن کے ساتھ کام کرنا ہر نئے اور پرانے اداکار کی خواہش ہے، چاہے پھر کتنا ہی چھوٹا کردار کیوں نہ کرنا ہو تب بھی کوئی یہ موقع ہاتھ سے نہیں جانے دیتا۔ لیکن شکتی کپور کی صاحبزادی شردھا کپور نے ماضی میں یہ موقع جانے دیا۔

شردھا نے انکشاف کیا ہے کہ، انھوں نے اپنی نادانی کے باعث سلمان خان کے ساتھ کام کرنے سے انکار کردیا تھا۔

انہوں نے بتایا کہ، جب میں 16 سال کی تھی اس وقت مجھے ایک فلم میں سلمان خان کے مدمقابل مرکزی کردار نبھانے کے لیے رول آفر کیا گیا تھا۔ لیکن تب میں نے محسوس کیا کہ میں بہت چھوٹی ہوں اور مجھے پہلے اپنی کالج کی پڑھائی کو مکمل کرنا چاہیے۔

شردھا سے جب فلم کا پوچھا گیا تو انہوں نے بتایا کہ، وہ فلم "لکی؛ نو ٹائم فار لوو" تھی۔ جس میں بعد میں پھر اداکارہ اسنیہا اُللال کو کاسٹ کرلیا گیا تھا۔

اداکارہ کا کہنا تھا کہ، میرے لیے سلمان خان کے ساتھ کام کرنے کی آفر کو ٹھکرانا کافی مشکل تھا کیوں کہ مجھے سپراسٹار کے ساتھ کام کرنے کا سنہری موقع مل رہا تھا۔

واضح رہے شردھا کپور نے اپنے کرئیر کا آغاز 2010 میں 'تین پتی' فلم سے کیا تھا لیکن اس سے قبل انھوں نے بیرون ملک سے اپنی انڈرگریجویٹ کی تعلیم مکمل کی تھی۔