مرد اپنے گھر والوں کے لیے کماتا ہے، اپنا خیال رکھنا بھول جاتا ہے ۔۔ نادیہ افغان نے مردوں کی کن الفاظ میں تعریف کردی؟ دیکھئے ویڈیو

معروف پاکستانی شوبز اداکارہ نادیہ افغان کا کہنا ہے کہ دنیا میں باپ سے بڑھ کر کوئی بے لوث محبت نہیں کرتا لیکن ہم بحثیت معاشرہ ان کی کبھی تعریف نہیں کرتے۔

تصاویر اور ویڈیوز شئیرنگ کی مشہور ایپلیکیشن انسٹا گرام پر نادیہ کا ایک ویڈیو کلپ مداحوں کی خاص توجہ کا مرکز بن رہا ہے جس میں انہیں مردوں کے لیے آواز بلند کرتے اور ان کی خدمات کو داد دیتے ہوئے دیکھا جا سکتا ہے۔

مذکورہ وائرل کلپ ان کے نجی فیشن میگزین کے پوڈ کاسٹ کو دیے گئے ایک انٹرویو سے لیا گیا ہے جس میں انہوں نے کہا ہےکہ ہم کبھی مردوں خاص طور سے باپ کی خدمات، بے لوث محبت کی بات ہی نہیں کرتے، ذکر ہوتا ہے صرف ماں ہی کا۔

اداکارہ نے کہا کہ ایک آدمی اپنے اہلِ خانہ کی خاطر روزگار کمانے کے لیے صبح گھر سے نکلتا ہے اور رات کو واپس آتا ہے، وہ اپنی اولاد کے لیے کماتا ہے اور گھر آ کر اپنا سب کچھ اپنی اولاد، بیوی، اپنے اہلِ خانہ کو دے دیتا ہے۔

انہوں نے کہا کہ مرد اپنے لیے کچھ نہیں رکھتے بلکہ سب کچھ اپنے اہل خانہ کے اخراجات پر خرچ کردیتے ہیں، بیشتر گھروں میں تو بیویاں ہی اپنے شوہروں کی ضروریات کا خیال رکھ رہی ہوتی ہیں ورنہ انہیں اپنا خیال بھی نہیں ہوتا۔

نادیہ افغان نے یہ بھی کہا کہ مرد کو بچپن سے یہ ہی سکھایا جاتا ہے کہ تم ذمے دار ہو، تمہیں سب کا خیال رکھنا ہے، ایسے میں وہ اپنا خیال رکھنا ہی بھول جاتا ہے جو کہ افسوس کی بات ہے۔