اسکول کے بعد والد کے ساتھ جوتے بناتا ہوں تاکہ ۔۔ ذہین معذور طالب علم نے میٹرک میں پنجاب بھر میں پہلی پوزیشن حاصل کرلی

کسی کام کو کرنے کے لیے اگرحوصلہ بلند ہو تو کوئی بھی رکاوٹ آپ کا کچھ نہیں بگاڑ سکتی۔ اس کی مثال اس طالب علم سے ملتی ہے جس نے اپنی معذوری کو اپنی کمزوری نہیں بنایا بلکہ اس حالت میں بھی بڑی کامیابی حاصل کی۔

گورنمنٹ اسپیشل اسکول حافظ آباد کے معذور طالب علم نعمان بشیر نے اسپیشل ایجوکیشن بورڈ کے تحت میٹرک کے سالانہ امتحان میں پنجاب بھر میں پہلی پوزیشن حاصل کر کے اپنے والدین کا سر فخر سے بلند کردیا۔

نعمان بشیرپیدائشی طور پر ٹانگوں سے محروم ہےاور 8 سال سے گورنمنٹ اسپیشل ایجوکیشن اسکول حافظ آباد میں تعلیم حاصل کر رہا ہے۔

ذہین طالب علم نعمان بشیر نے میٹرک کے سالانہ امتحان میں 1100 میں سے 758 نمبر حاصل کرکے پنجاب بھر میں پہلی پوزیشن حاصل کی جس پرصوبائی سیکرٹری اسپیشل ایجو کیشن پنجاب صائمہ سعید اور یونیسف کے نمائندہ نے نعمان بشیر اور اسکی ٹیچر عاصمہ بتول کو اعزازی سرٹیفکیٹ اور میڈل سے نوازا۔

اس موقع پر نعمان بشیر کا کہنا تھا کہ وہ اسکول سے واپس آکر اپنے والد کے ساتھ جوتے بنانے کا کام کرتا ہے تاکہ اپنی پڑھائی کے اخراجات پورے کر سکے۔

نعمان بشیر کمپیوٹر کی تعلیم حاصل کرنا چاہتا ہے اور اس کی خواہش ہے کہ وہ اعلیٰ تعلیم حاصل کر کے ملک و قوم کا نام روشن کر ے۔