شوبز میں کوئی کسی کا دوست نہیں ہوتا۔۔ زیادہ خرچ کرنے کے باوجود مریم نفیس کے شوہر بیوی سے کیوں ڈرتے ہیں؟

"عمر کی کوئی قید نہیں، اگر صحیح شخص مل جائے تو فوراً شادی کرنی چاہیے۔"

یہ کہنا تھا مقبول اداکارہ مریم نفیس کا، جنہوں نے حال ہی میں ایک مزاحیہ شو میں شرکت کرتے ہوئے اپنی زندگی کے اہم پہلوؤں پر کھل کر بات کی۔ انہوں نے نہ صرف اپنی ذاتی زندگی بلکہ شوبز انڈسٹری کے حوالے سے بھی کئی دلچسپ انکشافات کیے۔

مریم نے کہا کہ شوبز انڈسٹری میں ان کے زیادہ دوست نہیں ہیں اور جو ہیں، وہ پہلے سے ہی ان کے قریبی دوست تھے۔ ان کا ماننا ہے کہ کام کے ساتھی لازمی طور پر دوست نہیں ہوتے۔ "ہر کوئی ہر کسی کا دوست نہیں ہوتا، بلکہ اچھے تعلقات اور پروفیشنل شراکت داری الگ چیزیں ہیں۔"

مریم کے مطابق شادی کے لیے عمر کوئی مسئلہ نہیں ہونا چاہیے بلکہ "ایک صحیح اور مخلص ساتھی ملنا زیادہ اہم ہے۔" انہوں نے کہا کہ غلط شادی جسمانی، جذباتی اور نفسیاتی مسائل پیدا کرسکتی ہے، اس لیے فیصلہ سوچ سمجھ کر کرنا چاہیے۔

اداکارہ نے شوبز کو ایک دکھاوے کی دنیا قرار دیتے ہوئے کہا کہ "تصاویر اور ویڈیوز میں جو تعلقات نظر آتے ہیں، وہ اکثر حقیقت سے دور ہوتے ہیں۔" ان کے مطابق انڈسٹری میں مخلص اور گہری دوستی کم ہی دیکھنے کو ملتی ہے۔

اپنے شوہر سے متعلق بات کرتے ہوئے مریم نے مسکراتے ہوئے کہا کہ ان کے شوہر ان سے زیادہ خرچ کرتے ہیں، لیکن "وہ مجھ سے زیادہ ڈرتے بھی ہیں۔" انہوں نے مزید بتایا کہ عام طور پر مرد اپنی بیویوں سے ڈرتے ہیں تاکہ بحث سے بچا جا سکے۔

مریم نے انکشاف کیا کہ انہیں ماضی میں ایک فلم کی پیشکش ہوئی تھی جس پر وہ کام کرنے کے لیے راضی بھی تھیں، لیکن کورونا وبا کی وجہ سے وہ پروجیکٹ مکمل نہ ہوسکا۔ انہوں نے کہا کہ اگر انہیں کامیڈی کردار کا موقع ملا تو وہ ضرور فلم میں کام کریں گی۔

مریم نفیس کے انکشافات نے ان کے مداحوں کو نہ صرف ان کی زندگی کے بارے میں مزید آگاہ کیا بلکہ انڈسٹری کی چکاچوند کے پیچھے کے حقیقی حالات پر بھی روشنی ڈالی۔ ان کا مشورہ، کہ اچھے ساتھی کے انتخاب میں عمر کو نظر انداز کریں، بہت سے لوگوں کے لیے متاثر کن ثابت ہوسکتا ہے۔