کبھی کسی لڑکی سے فلرٹ کیا اور نہ ہی.. جاوید شیخ نے ماضی کے کارنامے بھلا کر نئے انکشافات کر دیے

"میں نے کبھی کسی لڑکی کو لائن نہیں ماری، نہ نمبر مانگا، نہ فلرٹ کیا"، جاوید شیخ کا انکشاف

پاکستانی فلم اور ٹی وی کے نامور اداکار جاوید شیخ نے حالیہ گفتگو میں اپنی نجی زندگی اور کیریئر کے دلچسپ پہلوؤں پر روشنی ڈالی۔ اشنا شاہ کے شو میں شرکت کرتے ہوئے جاوید شیخ نے کہا:

"میرے کیریئر میں مجھ پر بے شمار خواتین فدا رہیں، لیکن میں نے کبھی کسی لڑکی کو لائن نہیں ماری، نہ کبھی نمبر مانگا اور نہ ہی کسی کے ساتھ فلرٹ کیا۔"

انہوں نے کہا کہ بطور اداکار ان کی مقبولیت نے خواتین کے دلوں میں جگہ بنائی، لیکن وہ ہمیشہ اپنی حدود کا خیال رکھتے تھے۔

جاوید شیخ نے اپنی اور پہلی اہلیہ زینت منگی کی طلاق کا ذکر کرتے ہوئے بتایا کہ ان کے بچوں، مومل شیخ اور شہزاد شیخ، کو علیحدگی کے بعد مشکلات کا سامنا کرنا پڑا۔ انہوں نے کہا کہ بچوں کی کم عمری میں والدین کی علیحدگی ان کے لیے ایک کڑا وقت تھا، لیکن خاندان نے بچوں کو سنبھالا دیا۔

"طلاق کے بعد میری بہن اور بھائیوں کے بچوں نے میرے بچوں کا ساتھ دیا، جس سے وہ مشکلات سے نکلنے میں کامیاب ہوئے۔"

جاوید شیخ نے مزید بتایا کہ جب ان کے بچے بڑے ہوئے اور ان کی شادیاں ہونے کا وقت آیا، تب مومل شیخ نے ان سے درخواست کی کہ وہ گھر واپس آئیں اور ان کے تمام فرائض انجام دیں۔ "میں نے اپنے بچوں کی شادیاں اپنی نگرانی میں کروائیں، اور یہ میرے لیے والد ہونے کے ناطے ایک بڑی ذمہ داری تھی، جسے میں نے بخوبی نبھایا۔"

سینیئر اداکار نے اپنے مذہبی رجحانات کا ذکر کرتے ہوئے کہا کہ وہ حقوق اللہ اور حقوق العباد دونوں کا بہت خیال رکھتے ہیں۔

"میں ایک مذہبی انسان ہوں، رات کو تہجد بھی پڑھتا ہوں اور ہمیشہ اس بات کا خیال رکھتا ہوں کہ کسی کے حقوق پر ڈاکا نہ ڈالوں۔"