میرے گھر والے فکرمند تھے کہ 14 گھنٹے کا روزہ کیسے رکھوں گا ۔۔ اسلام قبول کرنے والے بھارتی اداکار نے روزہ رکھنے سے متعلق کیا انکشاف کیا؟

ماہِ رمضان کے مہینے میں اسلام قبول کرنے والے معروف بھارتی اداکار ویوین ڈیسینا نے روزہ رکھنے کا تجربہ شئیر کیا۔

بھارتی میڈیا رپورٹس کے مطابق ویوین ڈیسینا کا کہنا ہے کہ رمضان کا مہینہ اس لیے بھی دل کے بہت قریب ہے کیونکہ میں نے پانچ سال پہلے اسی ماہ میں اسلام قبول کیا تھا اور جب سے روزے رکھنے شروع کئے ہیں یہ میرا چھٹا رمضان ہے۔

بھارتی میڈیا کو انٹرویو دیتے ہوئے انہوں نے کہا کہ جب سے اسلام قبول کیا ہے تب سے ہر سال باقاعدگی سے پورے 30 روزے رکھ رہا ہوں لیکن کبھی طبیعت ناساز ہو تو روزہ نہیں رکھتا جس کی اجازت دین میں بھی ہے۔ مجھے اب مسلسل روزے رکھتے ہوئے 6 سال ہوگئے ہیں۔ انہوں نے بتایا کہ جب میرا پہلا رمضان تھا اس وقت میرے گھر والے میرے لیے کافی فکر مند رہتے تھے۔

ویوین ڈیسینا نے بتایا کہ شروع میں روزے رکھنا بالکل آسان نہیں تھا، مجھ سمیت میرے گھر والوں اور دوستوں کو بھی فکر تھی کہ میں کیسے 13 سے 14 گھنٹے تک کچھ بھی کھائے پیئے بغیر رہوں گا۔

اداکار نے بتایا شروع میں مجھے بھی سمجھ نہیں آتا تھا کہ میں روزے رکھ سکوں گا یا نہیں کیونکہ مجھے پانی اور کافی کی طلب ہوگی لیکن اللہ نے اتنی ہمت دی کہ روزے رکھنا بہت آسان ہو گیا اور کوئی مشکل پیش نہیں آئی۔

واضح رہے کہ ویوین ڈیسینا نے مصری خاتون صحافی نوران علی سے شادی کی تھی جس کے بعد وہ بحرین میں منتقل ہوگئے ہیں تاہم جب کبھی انہیں کوئی پروجیکٹ ملتا ہے تو ممبئی کام کے سلسلے میں آجاتے ہیں۔