حاملہ خواتین کو دورانِ حمل سینے کی جلن کیوں ہوتی ہے؟ اب چند گھریلو اشیاء سے اس مشکل کو آسان بنائیں

دورانِ حمل ایک عورت کو بہت کچھ برداشت کرنا پڑتا ہے، اپنی نیند سے لے کر اپنے سکون تک سب کچھ قربان کرکے ایک عورت بچے کو دنیا میں لاتی ہے تبھی تو پھر ماں کے قدموں کے نیچے جنت رکھی گئی ہے۔ بچہ جب پیٹ میں ہوتا ہے تو عورت کے جسم میں کئی تبدیلیاں رونما ہوتی ہیں، اور بچے کے وقت کے ساتھ بڑھنے سے اندرونی اعضاء جیسے کہ معدے اور بچہ دانی پر بہت دباؤ پڑتا ہے جس کی وجہ سے ایک جانب تو بار بار پیشاب کی حاجت محسوس ہوتی ہے تو دوسری طرف معدے پر دباؤ پڑنے کے سبب سینے میں شدید جلن ہوتی ہے۔ جس کی وجہ سے خواتین کو کافی مشکل پیش آتی ہے اور مجبوراً کھانے پینے کے معاملات میں بھی بے قاعدگی آجاتی ہے- اور ایسا کرنے سے نہ صرف کمزوری ہوتی ہے بلکہ اس کمزوری سے بچہ بھی متاثر ہو سکتا ہے۔
اس لیے آج ہم آپ کو کچھ ایسے عمل بتائيں گے جن کی مدد سے اس جلن پر قابو پایا جا سکتا ہے-

کھانے کا خیال رکھیں

عام طور پر مصالحے والی اشیاﺀ اور بادی والی اشیاﺀ اس جلن میں اضافے کا سبب بن سکتی ہیں اس لیے کھانا کھاتے ہوئے خیال کرنا چاہیے کہ ایسی اشیاﺀ کا استعمال نہ کریں جو کہ زیادہ مصالحے دار ہوں-

کچے دودھ کی لسی کا استعمال

سینے میں جلن کے لیے کچے دودھ کی لسی جادو کا کام کرتی ہے اس کی تیاری کے لیے بغیر ابلے آدھا گلاس دودھ میں آدھا گلاس پانی ملا کر حسب ضرورت چینی شامل کر کے پی لیں اس سے جلن کا خاتمہ ہو جائے گا-

بھنا ہوا زيرہ

سینے میں ہونے والی جلن کا ایک سبب ہاضمے کے عمل کی سست روی بھی ہو سکتا ہے اس کے لیے بھنے ہوئے سفید زيرہ کی ایک چٹکی لے کر اس کو اچھی طرح چبا کر کھا لیں اس سے بھی جلن کا خاتمہ ہو جائے گا-

کس وقت اور کس طرح کھائيں

دن میں تین وقت پیٹ بھر کر کھانے کے بجاۓ دن میں چھ بار تھوڑا تھوڑا کر کے کھائيں اس کے علاوہ کھانا کھاتے ہوئے سیدھے بیٹھیں کسی قسم کی ٹیک لگا کر کھانا نہ کھائيں اور رات سونے سے تین گھنٹے قبل کھانا کھالیں-

رات کو سوتے ہوئے تکیہ رکھنا

سینے کی جلن کو روکنے کے لیے گھر میں موجود تکیہ کا استعمال بھی بہت اہم کردار ادا کرتا ہے- سونے سے قبل سر کے نیچے چھ سے نو انچ اونچا تکیہ ضرور رکھیں تاکہ آپ کا سر سوتے ہوئے اوپر ہو اس سے کھانا جلدی ہضم ہو گا اور سینے میں جلن بھی نہ ہو گی-